Nodeems déi lescht Keynote éischter Hardware proposéiert huet, dréit sech dëse Rendezvous ëm déi nei Servicer, déi vun Apple dëst Joer nach ugebuede ginn.

E Méinden den Owend hat Apple op eng weider "Keynote" invitéiert, déi ganz am Zeeche vun de Servicer stoung. Nieft der SVOD (Video On Demand mat Abo), gëtt och déi nei Versioun vun Apple News virgestallt.

Apple News+

Een Accès op méi wéi 300 Zeitungen an enger App. Hei gouf virun allem un de Confort geduecht, fir am beschte liesen ze kënnen, dat mat animéiertem Contenu. All Artikel gëtt nei iwwerschafft, fir eng méi dynamesch Approche vun der Presentatioun ze erméiglechen.

Apple betount bei all Service deen hei presentéiert gëtt, dass de Respekt vun der Privatsphär extrem wichteg ass an dass iwwerhaapt keng User-Informatioune gedeelt ginn. Fir den Hierscht ass Apple News+ an Europa virgesinn.

Apple Pay mat enger neier Kaart

Bis elo goufe bal 10 Milliarden Transaktioune mat Apple Pay gezielt. Bis zum Schluss vum Joer misst och de Service a méi wéi 40 Länner disponibel sinn. Eng Bankkaart gëtt an Zesummenaarbecht mat Goldman Sachs a Mastercard proposéiert, fir iwwerall ze bezuelen, wou Apple Pay net aktivéiert ass. Dës Kaart soll och d'Privatsphär vun de Leit respektéieren, keng Informatioune ginn un Apple oder un d'Bank geschéckt an et kann een och bei all Akaf Sue verdéngen. Mat enger App kann een och all Transaktioun verfollegen a méi einfach erëmfannen, fir seng Finanze besser kontrolléieren ze kënnen, esou d'Presentatioun zu Cupertino.

App Store mat Apple Arcade

Am App Store sinn d'Spiller mat 300.000 Titelen déi Kategorie, déi am meeschte Succès huet. Hei ginn et 2 Kategorien: gratis Spiller an déi, déi ee bezuele muss, ouni Publicitéit. Dofir hu sech déi Responsabel elo ee fonkelneien Beräich iwwerluecht, an deem nëmme Spiller proposéiert ginn: Apple Arcade. Hei kann een mat engem Abo een illimitéierten Accès op méi wéi 100 Spiller kréien, dat fir Smartphone, Tablett oder via Apple TV. Dëse Service misst och am Hierscht a méi wéi 150 Länner disponibel sinn. De Präis vum Abo gouf awer nach net kommunizéiert.

Apple TV

Eng nei Manéier fir Tëlee ze kucken, mat enger neier Versioun vun der Apple TV-Applikatioun, mat ëmmer méi Contenu. An den USA sinn och Hulu, Playstation Vue, ShowTime, DirecTV an nach aner Chaînë vertrueden. Hei kann ee just dat bezuelen, wat ee kucke wëll, mat enger eenzeger App, ouni Pub. Streaming-Offeren, Serië vun HBO oder och nach den iTunes-Store sinn op enger Plaz versammelt. Et kann een dës Sendungen, Serien oder Programmer offline an iwwerall kucken: iPhone, iPad oder Apple TV awer och op Mac a connectéiert Tëleeën vu Samsung, LG, Sony a Vizio. Am Mee soll et lassgoen.

Exklusiv Contenue gi bei Apple TV+ ugebueden, dofir huet Apple grouss Nimm ugekënnegt, wéi eng Komedie-Serie mat Jennifer Aniston a Reese Witherspoon, déi vum Damian Chazelle (La La Land) realiséiert gëtt. Zwou weider Produktioune goufen annoncéiert, déi éischt gëtt vum M. Night Shyamalan an déi zweet vum Steven Spielberg produzéiert.

Den SVOD-Krich ass offiziell lancéiert

Mat 140 Millioune Leit, déi bei Netflix abonnéiert sinn, a 15 Milliarden Ëmsaz dat lescht Joer, wëll Apple logescherweis e Stéck vum Kuch kréien. Amazon Prime ka sech mat 100 Milliounen Abonnementer behaapten, ouni Hulu ze vergiessen, een online Service, deen nëmmen an den USA ze kréien ass, mat 25 Millioune Memberen.

© StockSnap

Disney misst och geschwënn seng eege Plattform lancéieren, mat engem estiméierte Budget vu 20 bis 60 Milliarden Dollar an déi exklusiv Disney, Lucasfilm oder Marvel-Filmer wäerten ubidden. Google ass am Gaangen, iwwer YouTube Serien ze produzéieren a Facebook misst och geschwënn eng nei Offer virstellen. Et gëtt also net ganz einfach, fir säi Choix ze maachen.

Ob dës Projete fir de Start fäerdeg sinn, wäerten de Public an d'Press e Méindeg Owend erausfannen.

A punkto Budget gëtt et och intressant, Amazon schwätzt schonn iwwert eng Serie vu Lord of the Rings mat engem Budget vun enger Milliard Dollar. Bis elo huet Apple net vill Zuele kommunizéiert, mä verschidde Responsabeler hu verséchert, dass d'VOD (Video On Demand) geschwënn eng Revolutioun erliewe wäert.