Si huet en Doktertitel an der Chimie, huet ënner anerem op der renomméierter Uni zu Harvard studéiert a mécht elo YouTube-Videoen.

An ass do schonn e bësse eppes wéi e Star. D'Mai Thi Nguyen Kim erkläert wëssenschaftlech Phenomener esou, dass jidderee se verstoe kann. Wat si u Wëssenschaft sou spannend fënnt, firwat ee Kaffi net soll direkt nom Opstoen drénken a firwat grad YouTube eng gutt Plattform fir Wëssenschaft ass. Dat huet si bei engem Virtrag um Belval villen intresséierten Nolauschterer erzielt.

An hire Videoe gräift si all méiglech Themen op. Dacks inspiréiert si sech och un der Aktualitéit. Et wär wichteg, als Wëssenschaftler um ëffentlechen Discours deelzehuelen. A virun allem sollt ee géint falsch Informatioune virgoen.