Ganz praktesch wann een op franséische Stroossen ënnerwee ass, dës Applikatioune weisen an Zukunft heiansdo guer keng Police-Interventioune méi.

Déi franséisch Deputéierten hunn een neit Gesetz gestëmmt dat d'Limitatioun vun esou Warn-Servicer wäert limitéieren.

Wann se dat rechtfäerdegt fannen, kënnen d'Agenten op Waze oder Coyote onsiichtbar ginn, andeems se d'Appe dozou zwéngen, hir Lokalisatioun net mat den Useren ze deelen. Dat ass allerdéngs nëmmen a bestëmmte Fäll méiglech, wéi eng Entféierung, eng Evasioun aus dem Prisong, eng Alkohol- an Drogekontroll oder wann Terroriste gesicht ginn.

Esou waren deemools d'Kouachi Bridder ouni Problem, no hirer Attack op Charlie Hebdo, nach laang ënnerwee gewiescht, well se genee woussten, wou Gendaarmen a Poliziste stoungen.

Esou e Verbuet gëtt allerdéngs staark encadréiert, d'Onsiichtbarkeet vun den Autoritéite kann nëmmen tëscht 2 an 12 Stonnen daueren a gëtt op enger Fläch vu maximum 10 Kilometer limitéiert. Déi Servicer déi dës nei Reegelen net respektéiere, riskéiere bis zu 2 Joer Prisong an eng Geldstrof vun 30.000 Euro.

Natierlech gëtt dat neit Gesetz vun Associatioune vun Automobilisten an Affekote ganz staark kritiséiert, well se do eng Méiglechkeet gesinn, méi Kontrollen (sief et Vitesse, Alkohol oder Drogen) komplett verstoppt ze organiséieren.

D'Leit déi schonn hir Vakanz a Frankräich mam Auto geplangt hunn, kënne berouegt sinn, dat neit Gesetz trëtt eréischt nächst Joer a Kraaft.