D'Firma, déi Facebook, Instagram an aner Servicer ënnert sech versammelt, soll net méi Facebook mee "Meta" heeschen.

Berichter, datt Facebook nach Enn Oktober den Numm un der Firma géing änneren, si schonn d'lescht Woch zirkuléiert. Den Internet-Gigant hätt wëlles, de Fokus op de "Metaverse" ze leeën, huet et an engem Bericht vu Facebook geheescht.

Dës Nouvelle gouf den Donneschdeg vum Facebook-CEO Mark Zuckerberg bestätegt. "Wëllkomm zum nächste Kapitel vun der sozialer Connectioun",  huet et no der Presentatioun vum neien Numm op der sozialer Plattform geheescht. Zu der Mammegesellschaft Facebook gehéieren nieft der gläichbenannter sozialer Plattform och Instagram, WhatsApp, Oculus an aner Plattformen.

Ënnert "Metaverse" versteet d'Firma eng Cyberwelt, an där déi physikalesch, déi erweidert, an déi virtueller Realitéit matenee verschmëlzen. Den neien Numm gëllt awer wéi gesot just fir d'Mammegesellschaft: déi sozial Plattform Facebook wäert hiren Numm behalen. "Eis Apps a Marken wäerte sech net änneren", esou de Mark Zuckerberg den Donneschdeg.