Twitter wollt u sech verhënneren, vum Milliardär Opkaf ze ginn ma elo wiesselt d'Firma fir 44 Milliarden US-Dollar de Besëtzer.

Twitter huet matgedeelt, datt si vum Milliardär Elon Musk Opkaf ginn an en Deal mam Tech-Milliardär agaange sinn. De Musk bezilt, fir d'Kontroll iwwert d'Firma ze kréien, ronn 54,20 Dollar pro Aktie vun Twitter. US-Medien no wieren dat am ganze 44 Milliarden US-Dollar, respektiv 41,1 Milliarden Euro. Dofir mussen d'Aktionären awer nach zoustëmmen, fir hir Aktien zu deem Präis ze verkafen. Twitter selwer stellt sech deem elo net méi an de Wee. No der Transaktioun soll Twitter och vun der Bourse geholl ginn.

De Musk hat Ufank Abrëll 9 Prozent vun Twitter kaf, dat iwwer Aktien. Domadder hat hien d'Méiglechkeet, an de Verwaltungsrot vun Twitter ze kommen. Dat wier awer un d'Bedingung geknäppt, datt hie maximal 15 Prozent vun Twitter dierft kafen. De Musk huet doropshin dee Poste refuséiert an annoncéiert, d'Firma kafen ze wëllen.

Dat den Musk Twitter kafe wëll, huet hien domadder erkläert, datt hie géint d'Mesuren, déi d'Riedefräiheet aschränken, wéilt virgoen. Mat deem Schratt kéint dann och den Donald Trump, dee jo wéinst dem Verbreede vu Fake News iwwert d'Coronapandemie a Walbedruch gespaart gouf, nees Accès op d'Plattform kréien.

Bis ewell war de Standpunkt vun Twitter, dat den Trump net méi zeréck komme kéint. De Musk dogéint denkt, datt sougenannten "Time-Outs" méi sënnvoll wieren, wéi e permanenten Ausschloss. De Musk selwer hat jo de Coronavirus erofgespillt an d'Mesuren a Kalifornien als "faschistesch" definéiert.