No méintelaangem Hin an Hier huet de Milliardär Elon Musk Twitter ee fir allemol iwwerholl.

Elon Musk keeft Twitter / Diana Hoffmann

An direkt a mat effet immédiat huet den neie Besëtzer souwuel de Chef vu bis elo Parag Agrawal an de Finanzchef Ned Segal grad wéi d'Chefjuristin entlooss, dat hunn ënnert anerem d'Washington Post an d'New York Times gemellt. De Kafpräis ware 44 Milliarden Dollar, also déi Zomm déi zanter dem Ufank vun der geplangter Transaktioun am Raum stoung.

Bloomberg mellt den Elon Musk wéilt selwer Chef ginn. Op laang Siicht kéint hien de Spëtzeposten awer un een Aneren ofginn. De Musk steet bis elo schonn un der Spëtzt vun ënnert anerem Tesla an der Weltraumfirma Space-X. Wéi et heescht géif hien och seng Annonce ëmsetzen a liewenslaang Spären fir Twitter-User ofschafen. Dovunner ass den Ament den Ex-President Donald Trump betraff zanter der Attack op de Kapitol am Januar zejoert.

Weider wëll den neie Chef Twitter vun den, aus senger Siicht, ze staarken Aschränkunge vun der Meenungsfräiheet befreien. Kritiker hunn elo Angscht, dëst kéint d'Dier nees méi grouss fir Haassrieden an Hetz opmaachen.

Vill Leit froe sech, a wéi eng Richtung sech Twitter ënnert dem Elon Musk entwéckelt. Kritiker fäerten, de Musk kéint Falschinformatiounen méi fräi zirkuléiere loossen an de Contenu manner streng moderéieren.

Méintlaang war net kloer, op den Deal wierklech géing ofgewéckelt ginn. Rezent nach hat den Elon Musk probéiert, sech aus der Affär ze zéien, andeems hie sot, datt hie falsch Zuelen iwwer fake Accounts bei Twitter virgeluecht kritt hätt. Doropshin huet Twitter hie viru Geriicht geholl. Ier et zum Prozess komm ass, hat den Elon Musk sech bereet erkläert, d'Entreprise fir 54,20 Dollar pro Aktie ze kafen.