Gëtt Fleesch-Iessen am Restaurant deemnächst verbueden? Wann et dem Christina Figueres no geet, kënnt dat an 10 bis 15 Joer de Fall sinn.

Déi Responsabel fir d’Klimaofkommes vu Paräis fënnt, datt Fleesch iessen ëmweltschiedlech ass a vergläicht et mam Fëmmen.  Et gëtt ëmmer méi verbueden. Eng Onmass vu Regelen a Kontrollen loossen der perséinlecher Fräiheet kaum nach Raum. Eegent Denken kréie mir ofgeholl. Dat féiert ganz dacks zu Reaktanz. Wat dat ass, erklärt de Guy Seyler a sengem Apropos vun haut.

AUDIO: Apropos vum Guy Seyler "Reaktanz"

Reaktanz entsteet, wann de Mënsch sech a senger Fräiheet ageschränkt fillt. Hie mécht da grad de Géigendeel, fir seng Eegestännegkeet erëm hierzestellen.
Wéi mir kleng waren, hate mir déi 10 Geboter. Si hunn eis Angscht gemaach, well se mat béise Strofen an der Häll verbonne waren. Datt de Mënsch sech trotzdem net ëmmer drun hale géif, wosste schonn dem Jesus seng Jünger. Duerfir hunn si mat de Geboter direkt och d’Beicht agefouert.
Fir datt eng Gesellschaft iergendwéi verstänneg zesumme fonctionnéiere kann, mussen et Regele ginn. Déi Regelen hunn awer nëmmen e Sënn, wann een och den Zweck dovunner agesäit. Si mussen engem aliichten.

Op eise Stroossen begéint een ee Verbuetschëld nom aneren. Verstitt dir, datt ee laanscht e Chantier nëmme mat 30 däerf fueren, wann et Sonndeg ass a keen Aarbechter wäit a breet ze gesinn ass? Wéi vill vun eis Foussgänger ginn duerch rout, wa lénks a rieds alles fräi ass?
Den neien Auto ass a 5 Sekonnen vun 0 op 100. Seng Héchstvitesse ass bei 250 gedrosselt. Dem Gesetz no kann een awer maximal mat 130 km an der Stonn ënnerwee sinn. Soss blëtzt et. Gëtt duerfir manner gerannt ?