Am Kader vun der Woch vun der Zivilgesellschaft, déi grad zu Belgrad stattfënnt, weise Vertriederinnen a Vertrieder aus der ganzer Welt op déi ëmmer méi staark Ënnerdréckung vun hiren Organisatiounen hin. Eng Carte Blanche vum woxx-Journalist Richard Graf.

AUDIO: Den Demokratie-Index fält ... Carte blanche vum Richard Graf

Säit dem Méindeg an nach bis de Freideg fënnt zu Belgrad déi international Woch vun der Zivilgesellschaft statt.

Nom Kale Krich a virun allem no der Weltëmweltkonferenz vu Rio am Joer 1992 gouf et e gewëssen Optimismus, sou datt a ville Länner d'Participatioun vun de Biergerinnen a Bierger un der politescher Gestaltung vun hire Gesellschaften no an no méi grouss ginn ass.

Ugefaangen huet déi Woch zu Belgrad mat engem sougenannte "Sommet" vun der Zivilgesellschaft. Den Term "Sommet" ass zwar eigentlech e Widdersproch, well et jo ëm en Zesummeschloss vu Graswuerzel-Beweegunge geet. E gouf awer symbolesch gewielt, fir d'Politik, déi sech jo och reegelméisseg op "Sommeten" trëfft, drop hinzeweisen, datt, iwwer all Grenzen an Ënnerscheeder ewech, och d'Vertriederinnen a Vertrieder vun der Zivilgesellschaft wichteg gemeinsam Fuerderungen hunn.

An tatsächlech gëtt d'Lëscht vun den Doleancen an der jéngster Zäit ëmmer méi grouss.

Sou weist den "Atlas vun der Zivilgesellschaft", deen Civicus (de Matorganisator vun der Belgrader Konferenz) co-editéiert huet, wéi an ëmmer méi Länner d'Akzeptanz vun enger lieweger an aktiver Zivilgesellschaft zeréckgeet.

Am Joer 2019 besteet an nëmme 45 Staaten en oppenen Ëmgang mat der Zivilgesellschaft. Mir kënne berouegt sinn: Lëtzebuerg ass do och derbäi.

Manner berouegend ass allerdéngs, dat an 23 Länner de genaue Contraire festgestallt gëtt: Do ass Zivilgesellschaft "closed", wéi et am engleschen Originalrapport heescht.

Do ass all zivilgesellschaftlech Engagement carrement verbueden a gëtt esouguer strofrechtlech verfollegt.

Wann een, statt der Zuel vun de Länner, d'Gréisst vun de Bevëlkerunge kuckt, déi do liewen, dann ass de Bilan nach méi bedenklech:

Déi Länner, wou d'Zivilgesellschaft oppen un de gesellschaftlechen a politesche Prozesser deelhuele kann, ëmfaasse just 282 Millioune Leit – dat si knapps 4 Prozent vun der Weltbevëlkerung.

Déi "geschlosse Staate" representéieren awer 2 Milliarde Leit, also 27 Prozent vun der selwechter Weltbevëlkerung.

Dertëschent leien d'Kategorië "beanträchtegt" mat 14 Prozent, "beschränkt" mat 36% an "ënnerdréckt" mat 19 Prozent Undeel un der Weltbevëlkerung.

Et sief ugemierkt, datt et och klassesch westlech Demokratië gëtt, wéi Frankräich oder d'USA, déi net an der éischter Kategorie aklasséiert ginn.

Méi wichteg wéi dës Foto vum Ufank vun 2019 oder d'Kritären, déi am Eenzelen zu deene verschiddene Bewäertunge gefouert hunn, ass allerdéngs déi allgemeng Tendenz, déi an de leschten Joren ze verspieren ass.

An déi weist eendeiteg no ënnen.

An zwar an alle Regioune vun der Welt.

Dem "Deliberative Democracy Index" no ass säit 2012 weltwäit e Réckgang vun den Demokratien, respektiv vun demokrateschen Decisiounsprozesser, festzestellen.

Säit Mëtt den 1990er Joren war dësen Index bis dohin ëmmer positiv.

Déi "gefillten" Ënnerdréckung, déi vill engagéiert Biergerinnen a Bierger iwwerall op der Welt ze spiere kréien, fënnt also an dem vun der Universitéit vu Göteborg entwéckelten Index e wëssenschaftleche Beleg.

Um Terrain moosse sech déi Verännerungen an der Zuel vun de willkürleche Verhaftungen oder, méi schlëmm, un där vun den Attentater, déi géint Vertrieder vun de Basisorganisatiounen ausgefouert ginn.

De"„Sommet" vu Belgrad rifft duerfir derzou op, dësen Trend ze stoppen an derfir ze suergen, datt grad am Kader vun enger nohalteger weltwäiter Entwécklung, déi zivil Rechter net weider zeréckgeschrauft ginn.