Eng Carte Blanche vum woxx-Journalist Richard Graf zu engem Exploit, dee Lëtzebuerg guer net gutt zu Gesiicht steet.

Carte Blanche vum Richard Graf

Haut op de 14. Februar feiert Lëtzebuerg eng zweete Plaz an engem Concours, fir deen et keen extra Communiqué vum Sportsminister wäert ginn. An d’Branding Spezialiste vu Luxembourg.lu freeë sech iwwer al Artikel, deen zu dësem Exploit an der internationaler Press net wäert erschéngen.

Gemengt ass natierlech den "Overshoot Day": Den Dag am Joer, wou Lëtzebuerg esou vill Ressourcë verbraucht huet, wéi an 12 Méint um selwechten Territoire kënnen nohalteg erstallt ginn.

Ab deem Dag lieft eist Land also ze soen op Kredit - vu Ressourcen, déi soss an der Welt entstinn, oder déi sech historesch z.B. a Form Pëtrols- oder Gasfelder weltwäit ugesammelt hunn.

Elo kann een zwar beim beim Vainqueur vun där Course, dem Golfstaat Qatar, doriwwer witzelen, ob et onbedéngt noutwendeg ass grouss Futtballmatcher - deemnächst soll et jo eng ganz Futtballweltmeeschterschaft sinn - bei 45 Grad am Schied ofzehalen, an duerfir musse riseg Klimaanlagen a Betrib ze huelen.

Dat kann awer net driwwer ewech tréischten, datt Lëtzebuerg, och ouni sou Exzesser, schonn esou fréi am Joer de Buttek eigentlech nees misst zoumaachen, well de Stock op deem mir wirtschaften, ausverkaaft ass.

Anescht gelies bräicht et aacht Äerd-Planéiten fir Weltbevëlkerung nohalteg ze bewirtschaften, wann d’ganz Welt wéilt esou liewen, wéi mir hei zu Lëtzebuerg.

Den traurege Rekord kënnt op Grond vun engem statistesche Modell zustanen, dee fir all Länner vun der Welt op d’selwecht Aart a Weis ugewannt gëtt. An no dëser Berechnung si mer eben déi, déi als zweet, wéi schonns di Jore virdrun, den Dag dierfe begoen. Wat besonnesch opfält: Mir „feieren“ e ganze Mount méi fréi wéi e ganze Peloton vu groussen Industriestaaten wéi d’USA oder Kanada an dräi Méint virun eisen direkten Noperen Däitschland a Frankräich.

A wat et nach ze bedenke gëtt: Den Overshoot Day kënnt praktesch all Joer een Dag méi fréi. Eng Tendenz, déi weltwäit duerch d’Pandemie kuerz, awer just ganz kuerz, gebremst gouf.

Natierlech gëtt e standardiséierte statistesche Modell ni allen partikularen Aspekter gerecht.

Zu Lëtzebuerg gëtt traditionell mam Fändel vum Tanktourismus gewonk: Millioune vu Liter Bensin an Diesel ginn zu Lëtzebuerg zwar getankt, awer net u sengem Territoire verbraucht. Awer och ouni d’Zuelen aus dem Tanktourismus, wär Lëtzebuerg och weiderhi bei de Champione vum Overshoot Day. Den Nohaltegkeetsrot hat d’lescht Joer nogerechent, datt ouni Tanktourismus an änlech aussergewéinlech Effekter, eise Bedarf un Äerden ëmmer nach bei sechs géing leien.
An domadder wäre mer a beschter Gesellschaft, zum Beispill mat den USA, an nach ëmmer nach duebel esou héich wéi di erwäänte Noperen. Deemno musse mer eis also nach eppes méi afale loossen, wéi gratis ëffentlechen Transport, wa mer dësen Trend wëllen ëmkéieren.