Déi amerikanesch Zentralbank FED an d'EZB hunn hir Tauxe massiivst an d'Luucht gesat an de leschte Méint. Dëst Joer ass deemno d'Enn vun der Nullzënspolitik oder der negativer Zënspolitik agelaut ginn, well Zentralbanke vun deenen zwee gréisste Bannemäert vun der Welt an d'Inflationsbekämpfung erageklomme sinn.

Den Ekonomist Marc Hostert mat e puer Iwwerleeungen zu dëser Trendwend.

Carte Blanche vum Marc Hostert

D'Covid-Kris an de Krich an der Ukrain hunn an de leschte Méint d'Präisser an eise Länner massiivst an d'Luucht gedriwwen an d'Inflatiounstauxe sinn op engem historeschen Héichpunkt ukomm. Fir d'Effete vun der d'Inflatioun ze bekämpfen, ginn eng ganz Partie Mesurë geholl: Präisdeckelung, direkt Hëllefen etc.

Fir d'Inflatioun selwer an de Grëff ze kréien, zéien d'Zentralbanken de Loyer vum Geld un. Enn vum Joer kéinten d'Zënsen an Amerika bei iwwer 5 % leien. D'EZB zitt no, awer net an där selwechter Vitesse. Dëst féiert zu enger Zënsdifferenz.

Mir mierken alleguerten den Effet vun dëser Zënsdifferenz op der Pompel. D'Präisser vun de Pëtrolsprodukter sinn a leschter Zäit massiivst an d'Luucht gaange wéinst de Klimataxen a wéinst der Ukrainkris, mä och well den Euro an de leschte Woche schwächelt an op e Rekorddéif vu ronn 0,98 Dollar gefall ass. De Pëtrol gëtt bekanntlecher Weis an Dollar gehandelt an dëse stoung d'lescht Joer nach bei iwwer 1,20 Dollar.

Dës Zënsdifferenz mécht déi europäesch Strategie vun der Inflationsbekämpfung nach méi komplizéiert, well elo nieft der Haapterausfuerderung der Inflatioun e Wiesselcoursrisiko derbäi kënnt. Dëse Risiko bleift bestoen esou laang dës Zënsdifferenz besteet.

Europa kann dës séier Zënshaussen awer kaum matgoen, well soss vill südeuropäesch Länner an och eise groussen Noper Frankräich massiivst Problemer kréie wéinst hirer Staatsschold.

Den Drock op Reformprozesser an dëse Länner wäert nees zouhuelen, genau esou wéi d'Diskussioun ëm déi sougenannten Eurobonds.

Dës grouss Zënsdifferenz kann, wann et net zou enger Koordinatioun tëschent der EZB an der FED kënnt, zu engem ëmgedréinte Wärungskrich féieren. Et keim zu enger Course wien déi stäerkste Wärung hätt. D'Wärungspolitik géif an dem Kontext net méi agesat ginn, fir den Handel tëschent de Länner unzekuerbelen, mä fir duerch d'Opwäertung vun der Wärung déi importéiert Inflatioun ze neutraliséieren oder esou guer duerch nach méi eng héich Opwäertung d'Desinflatioun ze importéieren.

Dëst hätt dramatesch Konsequenzen op d'Kompetitivitéit vun Europa a besonnesch fir Betriber an enger Exportnatioun wéi Lëtzebuerg.