A sengem Tëscheruff wennt sech de Guy Weber un d'Awunner vun der Insel a méi spezifesch un hir Politiker.

Léif Briten,

Maacht en zweete Referendum a bleift an Europa! Oder decidéiert wéinst menger och ouni Referendum, Bréissel de Réck net ze dréien. Mer hunn an de leschte Joerzéngten esou eng Haass-Léift mat iech entwéckelt, dass keen ouni deen anere méi kann. Där sidd e schwierege Partner, wëllt ëmmer Extra-Wurschte gebroden hunn. Där hutt an de leschte dräi Joer eis Politiker midd gemaacht (ewéi de Jean Claude Juncker des Woch am RTL-Interview betount huet) a sidd eis all mat ärem Zécken an Diskutéieren op d‘Nerve gaangen. Mä der hutt keng Alternativ zu Europa!

Halt dach op, äre Bierger d‘Mäerche vum Nees Opliewe vum groussen British Empire z'erzielen. Dat Kapitel ass ofgeschloss. Halt och op, äre Bierger Angscht ze maachen, d‘Tierkei wär muer vollstännege Member vun der Europäescher Unioun. Dat steet dach net op der Agenda. Halt op, déi däitsch Dominatioun an Europa an de Virdergrond ze hiewen. Mer sinn am 21. Joerhonnert ukomm. Déi tragesch Bréch an Europa aus dem 20. Joerhonnert si laanscht. Halt virun allem op, äre Bierger z'erzielen, si géife beim Brexit eppes gewannen. Sécher ass, dass an de leschte Jore vläicht Berodungsfirmen eppes gewonnen hunn. Nom Brexit dierft de klenge Bierger d’Rechnung bezuelen,wann der eis wierklech verlooss hutt.

Mat wiem wëllt der eigentlech da Geschäfter maachen, wann der eleng op der Insel setzt. Mat Washington? Mat Peking? Et ass schonns richteg, dass China iwwerall an Europa aspréngt, wou et brennt: A Griicheland, an Ungarn, an Italien. Wëllt der dat wierklech?