Direkt 2 Messerattacken d'lescht Woch, een Doudegen, e Buschauffer dee bedreet gouf, opmanst 2 Jonker déi am Spidol behandelt goufen, an Jugendlecher déi an d'UNISEC zu Dräibuer koumen. Et war en traurege Woche-Bilan. E Commentaire iwwert déi schwiereg Situatioun ronderëm de Bouneweger Quartier vum Tim Morizet.

Wat ass geschitt: Eng gutt Woch ass et elo hier, datt de 18-Joer-aale Rafael vun 2 Mannerjäreg mat engem Messer attackéiert gouf a seng Blessure net sollt iwwerliewe. D'Täter ware 15 a 17 Joer al. D'Affer wier Droge-Sue schëlleg gewiescht, heescht et aus direkte Kreesser – en Montant vu 400 Euro steet am Raum. E klenge Fësch, ënner e puer decken Déieren. Op d'manst ee vun den Täter war der Police Judicière schonn duerch e Fall um Kierchbierg bekannt – dëse gouf awer nees vum Untersuchungsriichter frei gelooss.

De Jonke vun 18 Joer an den Auteur waren zu Bouneweg am Lycée. Deen drëtte Jonken zu Ettelbréck. E véierte Jugendlechen, dee bis ewell néierens erwäänt gouf, gouf en Dënschden Owend bei der Ausernanersetzung blesséiert an, an d'Spidol bruecht. Hie ka mëttlerweil nees an d'Schoul.

D'Virfäll vun der leschter Woch geheie weiderhin eng Rëtsch Froen op. Déi éischt: Wéi konnt et esou wäit kommen?

Eisen Informatiounen no sinn opd'manst 3 Proffe mam Auteur, e Schüler a sengem Lycée bei Direktioun gaangen, fir ze mellen, datt de Jong geféierlech wier. Allen 3 wieren ëmgedréint ginn, d'Affär hätt keng Suite kritt. Hei gouf souguer den pedagogeschen Ëmgang mat de Schüler a Fro gestallt.

Och d'Konsequenze vun der Pandemie wieren net ze ënnerschätzen, heescht et bei den Sozialaarbechter um Terrain. E puer Drëpse ginn duer, fir e vollt Faass zum iwwerlafen ze bréngen. D'Schoul ass extreemst wichteg – et gëtt e Grond, firwat Spezialisten an och en Educatiounsminister soen d'Schoule mussen opbleiwen – d'Struktur, den Encadrement, eng deeglech Routine si besonnesch fir Schüler mat Problemer vun extreemster Wichtegkeet. Grad ewéi och d'Aktivitéiten no der Schoul – ewéi de Sport.

D'Politik gëtt sech esou lues bewosst, ewéi schwiereg d'Situatioun wierklech ass – e Saz, deen ech dës Woch e puer Mol vu Leit um Terrain zu Bouneweg a ronderëm d'Land gesot krut. Scho laang géif ee vun der Stater Gemeng aus op déi problematesch Situatioun hiweisen, esou d'Stater Buergermeeschtesch, Lydie Polfer am RTL-Interview dës Woch. Et wéisst ee sech net méi sëlwer ze hëllefen. Et wier dramatesch, datt esou eppes ewéi zu Bouneweg misst geschéien, fir datt op en neits Opmierksamkeet op dës Problematik kënnt. Bouneweg wier just d'Spëtzt vum Äisbierg.

Eng Problematik iwwert déi ee jo aus journalistescher Perspektiv gäre géif méi schwätzen, mä zanter eng Zäitche kritt een als Journalist keen Accord méi vun der Stater Gemeng fir mat engem Sozialaarbechter op de Terrain ze goen. Fir sech ze informéieren, ze observéieren, ze hannerfroen. Dat obwuel een och vun dëse Leit op d'Stroossen invitéiert gëtt.

Mir brauche keng politesch Elite déi Decisioune vun Uewen erof hëlt, mä eng déi elo effektiv de Leit um Terrain nolauschtert, déi sech engagéiert an och Drock op déi Acteuren ausüübt déi sech net oppe genuch weise e bekannte Problem an d'Hand ze huelen. D'Solutioun zu Problem leit bei de Leit déi um Terrain schaffen. Déi sech all Dag mat dëse Jonke beschäftegen.

Néansmoins, soll e System mat Problemer keng Excuse fir déi grujeleg Dot sinn. Et sief awer drun ze erënnere, datt soulaang keen Urteel gesprach ass, ee soll d'Presemption d'innocence respektéieren.