Den aktuelle Verkéierchaos ronderëm Käl ass awer just en Echantillon, sot de Buergermeeschter vun der Gemeng am RTL-Interview.

Wéi Ponts et Chaussées e Freideg de Moie matgedeelt hunn, ass de Chantier am Keeldall fréizäiteg fäerdeg ginn, an net eréischt den 29. Mee wéi Uganks geplangt. Zanter e Freideg de Moie 6 Auer ass d'Streck tëscht dem Cactus an der rue Neuve erëm fir den Trafic op.

John Lorent: Aktuelle Verkéierschaos als Echantillon, fir wat nach kënnt

VIDEO: Chantier Käldall: Verkéierschaos virprogramméiert
Den aktuelle Chantier zu Käl ass awer just en Echantillon vun deem, wat nach an den nächste Jore komme wäert.

Tëscht Téiteng a Käl ass den Ament bis viraussiichtlech Enn des Mount d’Haaptstrooss gespaart. Am Käldall waren d’Stroossen och schonn an de leschte Jore staark belaascht. Elo wou eng vun den Haaptachsen zou ass, ass de Chaos virprogramméiert.

AUDIO: Chaos am Käldall / Reportage Pierre Weimerskirch

De Problem deen am Käldall ass, léisst sech relativ einfach duerstellen. All Dag kommen 16.000 Gefierer zu Ëtteng iwwert d’Grenz, zu Rëmeleng, Käl an Téiteng liewen iwwer 15.000 Leit, wat e Plus vu 25 Prozent iwwert déi lescht Joren ass. D’Stroossennetz wier net ugepasst ginn, esou de Buergermeeschter vu Käl-Téiteng John Lorent. De Chantier, deen elo an der Haaptstrooss ass, kann een als Symptom dovunner gesinn.

Mir hu virun engem Joer festgestallt, datt de Belag virum Téitenger Kierfecht am Gaange wier, sech ze desintegréieren, mir woussten awer d'Ursaach net. Et schéngt esou ze sinn, datt d'Strooss net adaptéiert ass, fir dee ganzen Trafic, deen doriwwer geet. Ponts et Chaussées ass dann zum Entschloss komm, datt mëttelfristeg dee ganzen Tronçon tëscht Rëmeleng an der Collectrice muss komplett neigemaach ginn. Dëse Chantier ass awer just en Echantillon, esou de Gemengepapp.

All Chantier hätt mëttlerweil en Impakt op de Verkéiersfloss. D’Gemeng hätt viru Jore gepréift, fir e Contournement ze maachen. De Projet mat Tunnellen a Brécke wier awer politesch net drobar gewiescht.

Et gëtt jo gekuckt, fir méi op den ëffentlechen Transport ze setzen. Wann de Bus awer mam Privatverkéier am Stau steet, huet een do näischt geschafft. Dofir huet d'Gemeng Käl-Téiteng, zesumme mat Diddeleng a Rëmeleng, d'Initiativ geholl, fir d'Zuchlinnen nees ze beliewen. Do gëtt mëttlerweil och dru geschafft.

Kuerz a mëttelfristeg kéint sech d’Situatioun am Käldall net verbesseren. Déi nächst Woche gëtt de Verkéier iwwer de Rëmelenger Potto geleet, wou och aktuell geschafft gëtt an de Verkéier iwwert eng Spur leeft. Uewe kann ee lenks an d’Neiduerf oder riets zréck a Käl an de Rondpoint fueren. D’Leit aus Téiteng kënne parallel zur Haaptstrooss fuere a kommen dann och am iwwerlaaschte Rondpoint eraus. Dëse Rondpoint soll mëttelfristeg eng intelligent Luuchteschaltung kréien, fir de Verkéier méi flësseg ze maachen.

Fir d'DP-Sektioun Käl-Téiteng wier d'Zuchlinn tëscht Rëmeleng a Näerzeng  déi eenzeg Alternativ. D'Zich missten am Véierel-Stonnentakt fueren an et missten och zousätzlech Arrêten am Käldall dobäi kommen.

Rue Principale vum 13. bis den 29. Mee gespaart

De ganzen Tronçon, dat vum Parking vum Supermarché un a bis bei d'Kräizung mat der Rue Neuve, laanscht de Kierfecht, ass fir de kompletten Trafic gespaart, datt vum 13. Mee um 6 Auer bis den 29. Mee um 17 Auer. Och den Accès fir de Parking vum Kierfecht ass doduerch zou.

D'Deviatioun leeft, fir den Transitverkéier, iwwert de Käler-Potto, wou awer aktuell nach de Verkéier mat Chantiersluuchte gereegelt gëtt, dat, nodeem sech op dëser Plaz d'Strooss deforméiert hat. Déi lokal Deviatioun leeft op béide Säite iwwert d'Rue Thomas Byrne, d'Rue Piere Schiltz an Rue du Faubourg.

Donieft ginn och d'Arrête vun de Busse verluecht. Wéinst dësem Chantier wäert et och op verschidde Plaze verbuede sinn, fir do ze parken.

D'Informatioun vun der Gemeng:

Rue Principale partiellement barrée à partir du 13 mai 2019
L'Administration communale de Kayl tient à vous informer que l'administration des Ponts & Chaussées va procéder aux travaux de réfection de la rue Principale à partir du 13 mai 2019.

Par conséquent, le tronçon entre le parking du supermarché et la rue Neuve est barré à toute circulation à partir du lundi, 13 mai 2019, 06h00 jusqu'au mercredi, 29 mai 2019, 17h00.

La déviation du trafic transitoire se fera via le poteau de Kayl. La déviation locale se fera en double sens via la rue Thomas Byrne, la rue Pierre Schiltz et la rue du Faubourg.

Les interdictions de stationnements suivantes sont en vigueur pour la durée du chantier :
• Parking du cimetière de Tétange (installation de chantier) ;
• Rue du Faubourg à Kayl (tronçon maisons 4 à 10, tronçon maisons 44 à 52 et tronçon maisons 89 à 97).