Wéi d'Police um Freideg de Moie matdeelt, gouf d'Läich vun engem 20 Joer jonke Lëtzebuerger zu Déifferdeng op de Schinne fonnt.

D'Persoun loung an der Géigend vum Kierfecht an der Verlängerung vun der rue Pasteur.

D'Rettungsdéngschter op der Plaz hunn den Dout vum 20 Joer alen Awunner vu Wolz bestätegt.
De Parquet gouf informéiert an huet souwuel d'Spuresécherung wéi och de Miess- an Erkennungsdéngscht op d'Plaz geschéckt. Et gouf eng Autopsie ordonnéiert, fir déi genee Doudesursaach ze klären.

Et gesäit aus, wéi wa Friemawierkung kéint ausgeschloss ginn.

Wéinst der Interventioun vun de Rettungsdéngschter op der Gare zu Uewerkuer, goufen et uechter d'Land op villen Zuchstrecke Verspéidungen. Dat haten d'CFL via Twitter matgedeelt. D'Police an d'Secouriste ware wéi gesot op der Plaz. Zanter 9.30 Auer wier d'Interventioun vun de Rettungsdéngschter eriwwer an den Zuchtrafic soll sech lues a lues nees normaliséieren, heescht et vun den CFL. Et ware Busser agesat ginn, fir déi ausgefallen Zich ze ersetzen.

© Domingos Oliveira / RTL