Bis 2025 wäert een an Däitschland ënner gewësse Konditioune vu Primme kënne profitéieren, wann een en Elektro-Auto oder e Plug-In-Hybrid keeft.

Déi däitsch Regierung an d'Autosindustrie souzen e Méindeg den Owend zu Berlin fir e sougenannten Auto-Sommet beieneen. Dobäi gouf decidéiert, dass d’Primmen, déi ee kann ufroen, wann een en Elektro-Auto keeft, bis Enn 2025 verlängert ginn, an dass déi Primmen och méi héich sollen ausfalen.

Béid Säiten, also engersäits d'Regierung, an anerersäits d'Produzenten, deele sech d'Käschten op.

Bis 2022 sollen eng Millioun Elektroautoen op den däitsche Stroosse fueren, u sech war 2020 geplangt. Bis 2030 sollen et souguer 7 bis 10 Milliounen där Gefierer sinn.

Fir e rengen Elektro-Auto, dee manner wéi 40.000 Euro Basis kascht, wäert d’Primm vu bis ewell 4.000 Euro op 6.000 Euro klammen. Kascht den Auto méi wéi 65.000 Euro gëtt et guer keng Primm.

Am Verglach, hei zu Lëtzebuerg kritt ee fir en E-Auto eng staatlech Primm vu maximal 5.000 Euro. Egal wéi deier en ass.
Mat de méi héije Primmen, erhofft ee sech bei eisen Noperen, dass d’Verkafszuele vun den E-Autoe weider klammen. Dat geschitt zwar schonn, awer just op engem ganz déiwen Niveau.

An den nächsten 2 Joer sollen och ronn 50.000 nei ëffentlech Opluetstatiounen an Däitschland entstoen.