Sot eis Är Meenung: en Dënschdeg tëscht 12 an 13 Auer konnt Dir op Radio Lëtzebuerg matdiskutéieren.

Dir hat en Dënschdeg de Mëtteg d'Wuert. An der Mëttesstonn konnt Dir diskutéiert an eis soen, wat Dir vun de Mobilitéitskonzepter, déi Politik plangt, haalt.

Et goung do queesch duerch de Gaart. Esou géifen d'Bus- an Zuchreseauen, soubal et aus der Stad erausgeet, net méi reegelméisseg genuch fueren a wieren zu Spëtzenzäiten iwwerlaascht. Et wieren och net genuch Parkplaze bei de Garen, fir d'Autoen opzefänken, war d'Meenung vun aneren. Den Zuchverkéier wier och net frëndlech fir Leit, mat enger Behënnerung. Hei misste Leit a Rollstill laang op de richtegen Zuch waarden, deen se iwwerhaapt kéint mathuelen.

De Covoiturage war och e grousst Thema. Et misst een zu Lëtzebuerg ëmdenken an d'Autoen, déi d'Autobunne blockéieren, mat méi Leit fëllen.

Den neien Echangeur zu Diddeleng, de Park-Chaos op der Gare, d'Chantiersproblematik an de progressive Wuesstem, si weider Problemer, déi bis ewell genannt goufen.

Dir hutt d'Wuert vum 19. November

Zeréckzebehalen ass, datt d'Flemm bei ville grouss ass an datt d'Mobilitéit eng vun de ganz groussen Erausfuerderunge fir d'Politik bleift.

D'Emissioun "Dir hutt d'Wuert" zum Thema "Mobilitéit an der Stad an iwwer Land" war live dësen Dënschdeg tëscht 12 an 13 Auer mam Pit Everling.