Déi belsch-Lëtzebuerger Autosfederatioun FEBIAC plädéiert fir eng Rehabilitatioun vum Diesel, dat fir d'Klima-Ziler kënnen anzehalen.

Ass den Diesel elo finalement manner ëmweltschiedlech ewéi de Bensinner? Enger rezenter Etüd no sollen déi nei Diesel-Verbrennungsmotore bis 10% manner CO2 ausstoussen ewéi en Auto dee mat Bensin fiert. Dat bestätegt och d'Federation de l'Automobile et du Cycle zu Lëtzebuerg.

Plädoyer fir den Diesel / Reportage Tim Morizet

De Skandal ëm den Dieselgate huet dem Image vum Diesel-Motor vill geschuet. E gouf accuséiert méi ëmweltschiedlech ze sinn. E gouf vun Automobiliste condamnéiert a vu Regierunge bestrooft.

Rezenten Etüden no sollen déi nei Diesel-Autoen zum Deel genau esou gutt testen ewéi déi elektresch Modeller, a besser ewéi déi meescht Bensinner, erkläert de Guido Savi, Beroder vun der FEBIAC, der Belscher a Lëtzebuergesch Automobils Federation.

Guido Savi: „Haut ass den Niveau vum Stickoxid a Feinstëbs-Partikel bei engem neien Diesel, engem Euro 6, op deem nämlechten Niveau ewéi bei engem Bensinner. Mä den Diesel produzéiert ëm déi 10% manner CO2.“ Esou wär den Discours, datt den Diesel méi knaschteg wier ewéi de Bensin Deel vum Passé. Ëmmer méi Stied wieren um iwwerleeën hir „Niddreg Emissioun-Zonen“ opzeléisen.

Guido Savi: „Wann ee méi Diesel-Autoen zouléisst bréngt een automatesch och den CO2 Niveau erof. Mir brauchen effektiv Diesel-Autoen, fir eis Klimaobjektiver ze areechen.“ Laang oder kuerz Strecken duerch Stied géife bei den neie Modeller ëmmer manner eng Roll spillen, och wann den Diesel, duerch säin nidderege Verbrauch weider eng staark Alternative fir wäit Strecke bléift. Dat och am neie Joerzéngt.

Guido Savi: „Bis 2030 wäerte mer zu 50% mat elektreschen Autoe fueren. Do inclus sinn och d'Hybriden. De Rescht vum Marché wäert sech deen Ament an der Majoritéit tëscht Bensin a Diesel opdeelen.“

De Réckgang vum Diesel-Verkaf hätt negative Konsequenze fir d'Klima. Dat well d'Leit net op elektresch, mä Bensinner ëmgeklomme sinn, déi als Resultat méi CO2 astoussen.

Knapp 50% vun den Autoen, déi an de leschte Joren zu Lëtzebuerg zougelooss goufen, ware Bensinner.