D'Lëtzebuerger Eisebunn ass méi wéi zefridde mam Bilan vun 2019. An all den Aktivitéiten hätt een e Rekord-Resultat gemaach.

Mat 17,8 Milliounen Euro Netto-Resultat hätt een zejoert de beschte Chiffer an der Geschicht vun den CFL geschriwwen. 2018 waren et am Verglach 10 Milliounen Euro. An dat huet ënner anerem och mat de Passagéierzuelen ze dinn. A manner wéi 20 Joer, tëscht 2003 an 2019, haten d'CFL 85% méi Voyageuren an tëscht 2018 an 2019 e Plus vu 7,3 Prozent. Zejoert waren esou ronn 25 Millioune Passagéier mat der Eisebunn ënnerwee, sou vill wéi nach ni virdrun.

BAND CFL Bilan 2019

Och a puncto Cargo konnt d'Eisebunn hir Chifferen zanter 2010 méi wei verdräifachen. Et wär e ganz stabele Bilan, dee gutt wär, fir och méi schwéier Zäite kënnen z'iwwerbrécken.

Den CFL-Generaldirekter Marc Wengler: Mir hunn och e ganz niddregen Endettement trotz ganz héijen Investitiounen, déi mer och déi lescht Joerzéngte realiséiert hunn. Als Beispill kann ech do nennen, dass mer déi lescht 20 Joer iwwer 900 Milliounen a Roll-Material investéiert hunn. Dat heescht, dofir hunn mer och e relativ moderne Park haut. Mee eisen Endettement läit den Ament bei 290 Milliounen op Fonds propres vu 470 Milliounen. Wat e Ratio ass, deen eis wierklech wäert erlaben, och an Zukunft z'investéieren.“

Den CFL-Grupp ass donieft och den zweetgréissten Employeur am Land mat mëttlerweil am Ganze 4.796 Mataarbechter.

„Do gesäit een och, dass mer vill Entwécklunge gehat hunn. T'ass ee sech net ëmmer bewosst vu Joer zu Joer. Wann een hei iwwer 10 Joer kuckt, sinn iwwer 1.000 nei zousätzlech Mataarbechter, Emploien am Fong geschaaft ginn an den Entwécklunge vun eiser Organisatioun. A wéi virdru gesot, 174 méi Collaborateurem wéi dat Joer virdrun.“


E klenge B-Moll bei all de gudde Resultater sinn dann awer d'Retarde vun der Eisebunn, déi och ville Passagéier een Dar am A sinn. Do präziséiert de Grupp awer, dass een am Verglach mam Ausland ganz gutt géing do leien a sech och vun 89 op 90 Prozent verbessert hätt.

„Par Konter hu mer effektiv, wat d'Suppressioun vun den Zich ubelaangt, dat war 2018 3,1 Prozent vun den Zich an 2019 3,5 Prozent. Dat heescht, do hunn mer eis liicht verschlechtert. Dat kann een awer mat zwou grousse Saachen zum Deel erklären. Op der enger Säit sinn et Streike gewiescht, déi awer op franséischer Säit relativ vill Suppressioune mat sech bruecht hunn. Awer och ufangs des Joers, wéi der nach vläicht wësst, do hate mer d'Installatioune vum „Tour en fosse“, wou de Reprofilage vun de Rieder gemaach gëtt, deen net méi disponibel war, déi en panne war an dat wärend Wochen.“

Et wär een net zefridden domadder an et wéilt een nach weider Progrèse maachen, sou de Generaldirekter. Fir e Bilan 2020 gëtt sech natierlech e ganz groussen ekonomeschen Impakt duerch d'Coronavirus-Pandemie erwaart. Wann net nach eng zweet Well kënnt, da kéint een am Cargo-Beräich domat rechnen, dass iwwert d'Joer gekuckt, ongeféier 15% vum Chiffre d'Affaires an dem Beräich géingen ewechfalen, sou de Marc Wengler.