Tëscht Mäerz an Abrëll vun dësem Joer huet den Autossecteur ferm ënnert der Covid-19-Kris gelidden.

An hirer Analys vum Autosmaart vum 1. Semester weist d'FEBIAC, d'Fédération Belge et Luxembourgeoise de l'Automobile et du Cycle, an engem Schreiwes dorop hin, datt och den Autossecteur wuel nach méi laang mat den Nowéie vum der Coronakris ze kämpfen huet. Am Verglach vun zejoert goufen dëst Joer wärend der Period Mäerz bis Abrëll ronn 65% manner Gefierer zu Lëtzebuerg ugemellt.

Vu Januar bis Enn Juni goufen eng 20.800 Autoen am Grand-Duché immatrikuléiert, dat ass ee Réckgang vun 32,6%. Camionnettë goufen der knapps iwwer 2.000 ugemellt, dat si ronn 26% manner wéi am Joer 2019.

Donieft ginn zu Lëtzebuerg elektresch Autoen ëmmer méi beléift. Vun 2019 bis 2020 ass den Taux vun elektresche Gefierer hei am Land vun 1,8% op 3,4% geklommen, och ginn Hybridautoen zu Lëtzebuerg ëmmer méi heefeg ugemellt - si maachen 11,3% vun de Gefierer aus. Iwwerdeems dem Bensinner seng Part-de-marchéë weider klammen, verléiert den Diesel der liicht.

Insgesamt stellt d'FEBIAC och fest, datt den Auto lounen, amplaz vum Auto kafen, och ëmmer méi beléift bei de Verbraucher gëtt.

Och d'FEDAMO, d'Fédération des Distributeurs Automobiles et de la Mobilité, klot iwwer schlecht Zuelen duerch d'Corona-Kris.

Si hunn iwwerdeems de Mount Juni analyséiert, wou 4.648 nei Gefierer ugemellt goufen. Dat sinn déi meescht zënter Februar. Sou ass de Mount Juni 2020 just 10,6% hannert deem vun zejoert. Dat géif awer net heeschen, datt et dem Automobilsecteur elo nees géif gutt goen. Deen hätt nach un de Méint Mäerz, Abrëll a Mee ze knaen. Immatrikulatioune wier awer net gläich Verkaf. Wärend dem Lockdown waren d'Showroomen zou, dofir wier de Verkaf immens agebrach.

Wat déi allgemeng Immatrikulatiounen ugeet zitt d'FEDAMO en änleche Bilan wéi d'FEBIAC. Donieft mécht d'FEDAMO nach eng Prognos. Wann de Marché duerch d'Kris d'nämmlecht bleift, da géifen Enn des Joers ronn 18.000 Autoe feelen. Mat enger Moyenne vun 30.000 Euro pro Auto géif dat heeschen, datt dëst Joer iwwer eng hallef Milliard Euro manner fir den Automobilsecteur géifen erakommen.