Um Méindeg den Owend vun 21 Auer u war et souwäit: Den 1. Test op der neier Deelstreck vum Tram Stäreplaz-Gare centrale ass gefuer ginn.

Tram op der Gare ukomm / Reportage Tim Morizet

En huet et zeréck an d'Avenue de la Liberté gepackt. E Méindeg den Owend war et déi éischt Testfaart vum Tram um neien Tronçon tëscht der Stäreplaz an der Stater Gare. Vun elo u kënnt et zum sougenannte „March à blanc“, wou den Tram, och am Dag, op der Streck wäert getest ginn. Et war en historesche Moment, deen och e Grapp voll Spectateuren ugezunn hat, well fir déi éischte Kéier no 56 Joer stoung nees en Tram virun der Stater Gare.

Et war gudden Timing, laang a vill hat et e Méindeg den Owend an der Stad gereent, fir den Depart vun der Testfaart um 21.20 Auer dunn hat et sech berouegt. D'Testfaart selwer hat e kuerzen Retard, de Quai op de Stäreplaz war nämlech nach en Tick ze breet fir den Tram, mat Styroporsstécker goufe gréisser Schrumme verhënnert. Hei war virgeplangt ginn.

Fir de Rescht vum Trajet war een awer optimistesch, esou de Frank Vansteenkiste, President vu Luxtram:

Et gëtt gekuckt op mer iwwerall laanschtkommen, op keng Obstakelen am Wee sinn. Dat Ganzt geet wierklech ganz lues virun a mir hoffen, datt mer géint Mëtternuecht op der Gare ukomm sinn ouni gréisser Problemer.“

Am Schrëtttempo ënnert der strenger Kontroll vun den Ingenieure goung et du Richtung Gare, virun datt um Rousegäertche bemol gebremst gouf. Duerch ee Feeler um Computer nämlech huet den Tram, deen um neien Tronçon op den Arrête luede muss, kee Stroum kritt. Kuerzfristeg huet missen op d'Gare ofgeschleeft ginn. Kuerz virun Hallefnuecht du war et d'Arrivée. E Feeler mat deem ee gerechent hätt, heescht et bei Luxtram. An den nächsten Deeg geet testen an der Nuecht virun.

Déi Deeg dono wäerte mer och iwwert d'Nuecht, fir den Trafic net ze stéieren, déi Phas-Teste maachen am Schrëtttempo an da lues a lues d'Kadenz eropsetzen an ëmmer méi an normale Konditioune fueren. A vun Enn November u wäerte mer dann d'“March à blanc“ hunn, wou mer dann am normale Linnebetrib, zwar ouni Passagéier, bis op d'Gare fueren.“

Vum 13. Dezember moies 10 Auer u fiert den Tram da fir d'éischte Kéier vun der Luxexpo bis op d'Stater Gare.

Et ginn dann am Ganze 4 nei Statiounen: Hamilius, Place de Metz, Paräisser Plaz an d'Stater Gare.

Nieft der Stäreplaz kommen dann 2 weider grouss Pôles d'échange derbäi, nämlech um Hamilius an op der Gare.

D'Aarbechten an der Avenue de la Liberté an op der Garer Plaz sollen am Fréijoer d'nächst Joer ofgeschloss ginn. D'Paräisser Plaz an d'Place de Metz sollen dann am Summer 2021 ofgeschloss ginn.

A 24 Minutten vun der Luxexpo op d'Gare?

24 Minutte soll den Trajet duerno vun der Luxexpo um Kierchbierg bis op d'Gare daueren. Mä, ass dat iwwerhaapt machbar ?

A 24 Minutten vun der Luxexpo op d'Gare?
24 Minutte soll den Trajet duerno vun der Luxexpo um Kierchbierg bis op d'Gare daueren. Mä, ass dat iwwerhaapt machbar ?

Et ass eng theoretesch Zäit, déi iwwert déi nächst Wochen, wann och eidel, am Dag getest gëtt. Dat no den Zäite vum Horaire.

Aktuell dauert den Trajet Luxexpo – Stäreplaz offiziell 16 Minutte fir 11 Stoppen – hei sinn et allkéiers em déi annerhallef Minutt tëscht all Arrêt. Dat klappt och op ongeféier, ausserhalb vun de Spëtzenzäite ware mer gutt 17 Minutten ënnerwee.

24 Minutte sinn op d'mannst emol d'Zill – ob dat ëmmer realistesch ëmsetzbar ass bleift déi nächst Wochen ze klären – optimistesch ass een emol.

D'Zil um Méindeg war et awer emol den Tram, ouni gréisser Problemer, bis erof op d'Gare ze kréien.