Vun e Méindeg un an da fir zwou Woche fiert den Tram op der Streck tëscht der Stäreplaz an der Gare an der "Marche à blanc".

D'Testphas vum Tram um neiem Tronçon tëschent der Stäreplaz an der Gare goung de 5. Oktober un. D'Ingenieure vu Luxtram a vun der CAF, der Gesellschaft, déi den Tram gebaut huet, féieren zanterdeem eng ganz Rei Tester duerch, wéi de Gabarit, d'Leeschtung vun de Super-Kondensatoren, d'Signalisatioun vun den Infrastrukturen, an den elektresche System.

Vun e Méindeg u geet et dann an déi allerlescht Phas: d'"Marche à blanc". Wärend 2 Woche fiert um neien Tronçon den Tram an de selwechte Konditiounen, wéi wann de Service scho kommerzialiséiert wär, just hëlt en do nach keng Passagéier mat. Dës Phas déngt de Chaufferen, fir sech mam neien Deel vun der Streck vertraut ze maachen, soll awer och hëllefen, fir dass de Foussgänger, den Automobilist oder de Buschauffer sech un dat neit Transportmëttel gewinne kann.

Eng vun de grousse Partikularitéite vum Tram ass seng grouss Kapazitéit. Bis zu 430 Passagéier kéinten ausserhalb vun de Krisenzäiten transportéiert ginn. Frequenz vun de Passagë läit tëschent 3 a 7 Minutten. Vum 13. Dezember u soll den Tram da komplett vum Kierchbierg bis op d'Gare fueren.