Well d'Plaz an de Verkafsraim limitéiert ass, sollen d’Leit och sou gutt et geet am Viraus e Rendez-vous froen.

Et ass de Rendez-vous vum Joer fir d'Autosbranche, 30-40% vun de Ventë ginn am Ufank vum Joer gemaach. Den Autosfestival 2021 kann trotz Pandemie ofgehale ginn, natierlech ënnert enger aner Form wéi soss. Déi zoustänneg Autosfederatioun Fedamo huet e Méindeg de Moien d'Detailer vun der 57. Editioun vum Autosfestival presentéiert.

Wat mer eis am meeschte wënschen, ass, datt mer nieft der Gesondheet nees zur Normalitéit zeréckkommen. Et kann een et dréie wéi ee wëll, den Autosfestival ass e klengen Deel vun dëser Normalitéit. Et ass e wichtege Rendez-vous fir Leit, déi sech fir Autoen interesséieren an drun denken, sech en Auto ze kafen.

An och e wichtegen Indicateur fir d'Wirtschaft, sou de Philippe Mersch, President vun der Autosfederatioun Fedamo.

Zéngdausende Leit, déi sech duerch Showroomen drécken, Schnittercher iessen an e Pättchen drénken: Dat si Biller, déi een dëst Joer net dierft gesinn. De festleche Volet fält ewech. Et géing ee sech op dat allernéidegst limitéieren, sou de Philippe Mesch.
Eng Ännerung ass dann och déi, datt d'Evenement déi Kéier méi laang dauert.

Datt den Depart ëm 5 Deeg no vir geréckelt gouf, fir Visitte besser ze verdeelen.

D'Konditioune géingen dann och scho vun e Méindeg u gëllen. An den 170 Showroome vun den 88 Partner-Garagë gëtt eng strikt Charte sanitaire agehalen. D'Fedamo huet do zesumme mam Gesondheetsministère e Konzept ausgeschafft.

De Port vum Mask, d'Desinfizéiere vun den Hänn, de Marquage um Buedem: Vill Concessionnairen hunn decidéiert, den Auto zou ze spären, e kann awer op Demande opgespaart ginn, dono gëtt en dann desinfizéiert. Dat selwecht gëllt fir Testfaarten, déi also nach méiglech sinn.

Well d'Plaz an de Verkafsraim limitéiert ass, sollen d'Leit, wann et méiglech ass, am Viraus e Rendez-Vous froen. Op de meeschte Plaze kéinten d'Rendez-vouse mat Vendeuren oder Testfaarten online gebucht ginn.

Zejoert wier keen einfacht Joer gewiescht, heescht et weider vun der Auto-Federatioun, et goufe knapp 18% manner Neiween verkaaft. Bei den Occasioune war den Impakt manner grouss.

Autosfestival / Rep. Pit Everling

Den Diesel huet staark u parts de marché verluer. Do steet par Rapport zu 2019 e Minus vu gutt 27%, beim Bensinner sinn et souguer bal 30%, woubäi d'Bensinsmotore sech awer op der éischter Plaz kënne behaapten. Op där aner Säit markéiert 2020 eng Zort Duerchbroch fir déi sougenannt elektrifizéiert Gefierer.

De Manuel Ruggiu vun der Société Nationale de Circulation Automobile: Hybriden +104,5%, bei den elektreschen Autoen ass et e Sprong vun 150%, wat och dru läit, datt lo ganz vill Autoen um Marché sinn.

Knapp 2.500 Elektrogefierer si verkaaft ginn. Plug-In-Hybride waren et der ronn 200 méi. En décke Sprong no vir gouf et och an der Kategorie Hybrid, woubäi hei och déi sougenannte Mild-Hybride matgezielt ginn. Hei kréien thermesch Moteure vun elektreschen Elementer gehollef, fir Sprit ze spueren, zum Beispill beim Lassfueren.

En anere Grond, datt elektrifizéiert Gefierer zejoert sou gutt ukoumen, läit mat Sécherheet bei de staatleche Primmen.
De Philippe Mersch hofft, datt dës Hëllefe verlängert ginn.

Mir hate lo eng Entrevue mam Ministre de tutelle. Et gesäit gutt aus, mä et ass net confirméiert. Sou laang et net confirméiert ass, lafen déi Primmen Enn Mäerz aus.

Bei de Modeller geet den Trend iwwregens nach ëmmer a Richtung SUV.