Um Donneschdeg den Owend huet de François Bausch den Ausbau vum Tram presentéiert an och matgedeelt, wéi et mam Hesper Contournement weidergeet.

E Projet, deen de Quartier urbanistesch wäert opwäerten, esou huet de Minister fir Mobilitéit an ëffentlech Aarbechten François Bausch den Ausbau vum Tramsreseau beschriwwen.

Tram kënnt op den Houwald - Reportage Dany Rasqué

De Minister huet dee geneeë Projet am Kader vun enger digitaler Presentatioun en Donneschdeg den Owend virgestallt. Ronn 5 Kilometer vun der Stater Gare bis bei den neie Stadion op der Cloche d'Or. Bannent den nächsten dräi Joer investéiert de Staat ronn eng hallef Milliard Euro an d'Mobilitéit.

Net manner wéi 3 grouss, fir den Osten an de Süde vum Land ganz wichteg Pôles d'échange, sollen op den Tronçonen C an D vum Tram entstoen. Dee Spektakuläerste gëtt op der Héicht vun der Rue des Scillas iwwer d'Eisebunn gebaut. Hei wäert et méiglech sinn, vu Bus, Tram, Eisebunn, Vëlo an och dem Auto hin an hier ze wiesselen. Well geluecht ginn net just Schinnen, och nei Stroosse gi gebaut, dorënner de Contournement vun Hesper-Alzeng, deen eventuell 2023 an d'Bauphas goe kéint.

Dat heescht, datt mer Hesper immens vill Liewensqualitéit zeréckbréngen, e verkéiersberouegte Raum maachen. Dofir hu mer elo en Aarbechtsgrupp agesat, mat der Gemeng zesummen, esou wéi mer et och zu Esch/Uelzecht gemaach hunn. Fir de Maximum aus där Variant erauszezéien, déi eng Kéier gebaut gëtt. D'Studien, et ass alles fäerdeg. Ech waarden nach op lescht Detailer an da gi mer an d'ëffentlech Prozedur, sou de Minister Bausch.

Uewenaus um Plateau rullen d'Baggere schonn zu Bouneweg. Do wou déi nei National-Strooss 3 gebaut gëtt, fir d'Diddenuewener Strooss z'entlaaschten. Nach huet de Staat net all néideg Emprisen op der Trace vum Tram an der Täsch. An der Rue des Scillas lafen nach Gespréicher mat zwee Proprietären, déi och ouni séieren Accord de Projet net blockéiere wäerten, ma derzou bäidroe kéinten, datt den Tram op zwou Plazen an enger éischter Phas just Eegleiseg fuere kéint.

Op der anerer Säit vun der Eisebunn op der Cloche d'Or soll spéitstens 2028, wann den Tram vun Esch/Uelzecht bis do ukënnt, en neie Banne-Ring fäerdeg sinn, deen den Zentrum vun der Stad Lëtzebuerg weider entlaaschte soll. Mat dem Boulevard de Merl an dem Boulevard de Cessange, vu Stroossen bis op d'Cloche d'Or.