Dat confirméiert de Mobilitéitsminister François Bausch der CSV-Deputéiert Octavie Modert, déi an enger parlamentarescher Fro d'Detailer gewuer wollt ginn.

Bei verschiddene Formatiounen, déi een am "Centre de Formation pour conducteurs" zu Colmer-Bierg muss maachen, muss een den Ament Gedold hunn. Et gëtt nämlech en Délai d'attente vun ongeféier 4 Méint. Dat schreift de Mobilitéitsminister François Bausch an der Äntwert op eng parlamentaresch Fro vun der CSV-Deputéiert Octavie Modert. Hier war zu Ouere komm, datt et nawell laang dauert, bis een den Ament do e Rendezvous kritt.

Waardezäiten am Formatiounszenter - Reportage Dany Rasqué

Betraff sinn ënnert anerem déi Chauffeuren, déi hir 12 Punkte verluer hunn a fir déi e Passage am Formatiounszenter  obligatoresch ass, fir de Permis zeréckkréien. Méi laang Waardezäite ginn et awer och, fir déi jonk Chaufferen, déi zu Colmer-Bierg musse passéiere beim Auto a beim Moto an och fir Beruffschaufferen.

Schold un deene méi laangen Delaien ass wuel de Coronavirus. De Minister Bausch schreift, datt et d'selwecht ass, wéi bei deenen aneren Institutiounen, déi an der Educatioun oder an der Formatioun aktiv sinn. Wärend dem Etat de crise hunn d'Coursë missten ënnerbrach ginn.

Op Nofro hi kréie mer am Mobilitéitsministère präziséiert, datt de Formatiounszenter den Ament dofir suergt, datt d'Leit hir Formatioun am legale Kader kënne maachen. Dat heescht, jonk Chaufferen, déi eng Stagezäit vun zwee Joer hunn an déi elo um Enn vun där Zäit ukomm sinn, gi virgezunn. Esou datt den Ament net onbedéngt nom Motto geschafft gëtt: "Deen éischten ass vir".

Prioritéit kréien och déi Chaufferen, déi hire Führerschäin ewechgeholl kruten, well se keng Punkte méi haten. An deem Fall gëllt eng Suspensioun vun 12 Méint. An där Zäit muss ee zu Colmer-Bierg passéieren an de Formatiounszenter garantéiert och, datt een eng Plaz kritt ier déi 12 Méint ëm sinn.

De Ministère mécht awer e waarmen Appell un d'Leit net bis op de leschte Stëppel ze waarden, ier se sech fir e Rendezvous mellen. Et sollt een dat wéinstens dräi Méint virum Enn vun der Suspensioun maachen.

De Formatiounszenter huet och Enn d'lescht Joer zwee nei Psychologen agestallt. Duerch hir Hëllef an duerch eng iwwerschaffte Gestioun vun de Rendezvousen, sollen d'Waardezäite bis Uganks Summer erëm op engem normalen Niveau vun zwee bis dräi Méint sinn.