D'gëllen Zäite si scho laang vergiess. 2007 gouf d'Rekordzuel vu 4 Millioune Passagéier erreecht.

Am Mee 1993 ass op der fréierer US-Base vun Hahn en éischte Passagéierfliger gelant. 6 Joer méi spéit koum de Fluchhafen awer eréischt richteg op Touren. Mat der Arrivée vun der Ryanair. Et waren deemools déi éischte Flich vun enger Bëllegfluch-Gesellschaft op däitschem Buedem. Déi ganz Regioun tëscht Mainz an Tréier sollt dovu profitéieren.

Dës Woch huet de Fluchhafen aus dem Honnsréck nees fir Schlagzeile gesuergt. De Fluchhafe Frankfurt-Hahn ass faillite.

12 Flich, vu virop der Ryanair, awer och der Wizz-Air waren e Sonndeg vum Hahn aus geplangt. A se sinn och gestart. Vum Europäesche Verbraucherzenter, mat Sëtz hei zu Lëtzebuerg ass et awer de Rot u Passagéier, déi aus dem Honnsréck eraus reese wëllen, nach iert se op Hahn fueren, bei der respektiver Fluchgesellschaft z'informéieren, ob de Vol och effektiv start. Géif deen ausfalen, da muss d'Airline eng raisonnabel Alternativ ubidden oder den Ticket rembourséieren.

"D'Passagéier kënne villäicht mengen, dat wéi sou oft op der Basis vun der Europäescher Direktiv, och nach eng zousätzlech Entschiedegung méiglech ass. Dat ass am Fall vun der Faillite vum Fluchhafen awer net méiglech. Sou eng Faillite gëtt als aussergewéinlech Ëmstänn ugesinn. Da kann et normalerweis keng zousätzlech Entschiedegung ginn", sou d'Karin Basenach, d'Direktesch vum Europäesche Verbraucherzenter.

Wat d'Faillite u sech ubelaangt. D'Nouvelle huet d'Observateuren aus dem Secteur net iwwerrascht.

D'gëllen Zäite si scho laang eriwwer. 2007 gouf d'Rekordzuel vu 4 Millioune Passagéier erreecht. Dorënner deemools ganz vill Lëtzebuerger. Zanterhier goung et awer just nach biergof. Den Haaptclient Ryanair huet seng Strategie geännert a lant an Tëschenzäit direkt um Findel an och beim Noper zu Frankfurt. 2019, dem Joer virun der Pandemie goufe just nach 1,5 Millioune Passagéier gezielt. Dobäi kënnt dat d'Mammegesellschaft aus China, den HNA Grupp selwer ugangs vum Joer an d'Faillite goung.

Eng 500 Mataarbechter zidderen elo am Honnsréck ëm hier Zukunft. Ob et dem Liquidateure geléngt nei Investisseuren ze fannen? Experte si pessimistesch.

Dodru wäert och d'Geschäft mat Cargo, dat den Ament boomt, kaum eppes änneren. Am August gouf et hei nach Plus vu 17,5 Prozent am Verglach mam selwechte Mount d'lescht Joer. Den Haapttromp sinn do d'Nuetsflich. Där si nämlech keng zu Lëtzebuerg oder Frankfurt erlaabt. Ma eleng déi Kaart géif an dësen Zäite kaum duergoen, fir all déi aner strukturell Problemer vum Fluchhafen Hahn an de Schied ze stellen, sou Analysen.

Finanzsprëtze vum Land Rheinland-Pfalz ginn et keng méi. Hei leeft souguer um Europäesche Geriichtshaff, nach e Prozess.