D'Kräizung tëscht dem Circuit de la foire an dem Rond-point Serra war tëscht kuerz no 16 an 20 Auer blockéiert no engem Problem mat engem Tram.

Am spéiden Nomëtteg gouf et en techneschen Incident mat engem Tram. Am Depot um Kierchbierg gouf et géint 16 Auer e Problem mat enger Weich. Dowéinst ass den hënneschten Deel vun engem Tram aus der Schinn gesprongen. Deen Tram war am Gaang, aus dem Depot erauszefueren, a war op der Héicht vum Rond-point Serra stoe bliwwen, wou en d'Zoufaart vum Circuit de la Foire an de Rondpoint blockéiert huet.

Et war kee Passagéier am Tram an d‘Linne goufe weider net impaktéiert, sou Luxtram. D'Ekippe ware séier op der Plaz, fir den hënneschten Deel vum Tram nees an déi richteg Schinn ze setzen. Dëst ass hinne géint 20 Auer gelongen an den Tram konnt zeréck an de Schapp fueren.