Vum 24. Januar bis de 5. Februar ass déi 58. Editioun vum Autosfestival. D'Autosfederatioun Fedamo huet dëse Méindeg d'Detailer presentéiert.

Et ass eppes wéi den Heemount fir d'Garagisten. Si maachen 30 bis 40 Prozent vum Jores-Ëmsaz um Autosfestival. Vum 24. Januar bis de 5. Februar ass déi 58. Editioun, déi och déi Kéier ënner Pandemie-Konditiounen ofgehale gëtt. D'Autosfederatioun Fedamo huet e Méindeg de Moien d'Detailer presentéiert.

Autofestival 2022 / Reportage Pit Everling

Ronn 80 Betriber mat 170 Ausstellungsraim maachen hir Diere fir d'Clienten op. De Festival dauert och dëst Joer nees knapp zwou Wochen, mat engem oppene Sonndeg dotëscht, zejoert war jo keng Sonndesouverture erlaabt.

An de Garagë gëlle gewëss Hygiènesreegelen, ewéi Maskeflicht an Distanz. Et gëtt awer och zum Beispill keen Iessen a Gedrénks zerwéiert.

De Fedamo-President Philippe Mersch:

"Wa lo ee sech d'Fro stellt, firwat datt iwwerhaapt en Autosfestival organiséiert gëtt dann äntwert de Philippe Mersch, firwat net."

D'Clientë brauchen Autoen an de Secteur mat senge 5.000 Salariéë muss liewen.

Déi grouss Shoppingzentere sinn op an am Dezember si 55.000 Lëtzebuerger mam Fliger an d'Vakanz geflunn.

"Eng nei Normalitéit schéngt unzestoen."

D'Garagiste kucken no 2020 och op e schwieregt Joer 2021 zeréck.

"Mir hate gehofft, datt mir 2021 zeréck an eng gewëss Normalitéit kéimen, ma nee mir sinn an eng zousätzlech Kris eragerëtscht an zwar an déi vun de Mikroprozesseren."

Well heiwéinst vill bestallte Ween ze spéit geliwwert ginn, ass d'Zuel vun den Umeldunge vun Neiween zejoert weider zeréckgaangen. Se läit um Niveau vun 2007 an 20 Prozent ënnert dem Chiffer vun 2019. D'Demande ass awer op héijem Niveau an den Occasiounsmaart dréint staark.

Elektrifizéiert Gefierer sinn zejoert sou gutt ukomm wéi nach ni. Si hu méi wéi en Drëttel vun den neien Immatrikulatiounen ausgemaach.

"D'Augmentatioun ass ëmsou méi interessant, wann ee bedenkt, datt zejoert méi Elektroautoe verkaaft goufe wéi an all de Jore virdrun. Och bei den Hybriden ass d'Evolutioun änlech, do si mer entretemps bei 26,3 % vun den Immatrikulatiounen."

D'Fedamo fuerdert weider staatlech Efforte bei den Infrastrukturen an hofft op eng Verlängerung vun de Primmen iwwer den 31. Mäerz eraus. Ma och thermesch Gefierer hätten nach eng Zukunft, sou de Philippe Mersch.

D'Fedamo hofft iwwregens op eng gewëss Normalitéit am Joer 2023.

Immatrikulatiounen 2020: Elektrifizéiert Gefierer setze sech ëmmer méi duerch

Zejoert goufen 137.564 Gefierer zu Lëtzebuerg ugemellt, 3,2 Prozent méi ewéi 2020. Allerdéngs goufe manner Neiween ugemellt.

Immatrikulatiounen 2020 / Reportage Pit Everling

Elektrifizéiert Auto schéngen iwwerdeems den definitiven Duerchbroch ze feieren. Bei der Presentatioun vum Autosfestival 2022 huet d'Sociétéit fir Agreatioun SNCA déi neiste Chiffere presentéiert.

Knapp 57.000 nei Gefierer goufen zejoert ugemellt, dorënner gutt 44.000 Autoen. Dat sinn der manner wéi an de leschten 2 Joer.

De Manuel Ruggiu vun der SNCA:

"44.372, dat ass -1,8 Prozent par Rapport zum leschte Joer, wat schonn e schlecht Joer war an dann hu mer 19,8 Prozent manner wéi dat historescht Joer virum Covid, 2019, wou mer éischter an der Normalitéit waren."

Wouru läit et? Net un der Demande, déi ass do. De Grond ass d'Penurie bei de Mikrochippen, wéinst där vill Autoe mat Retard ausgeliwwert ginn. Och wéinst dëser Situatioun hunn d'Clientë verstäerkt op Occasiounen zeréckgegraff, déi wéinst der héijer Demande méi deier gi sinn.

Elektrifizéiert Gefierer setze sech ëmmer méi duerch, si hunn zejoert en décken Drëttel vun den Neiimmatrikulatiounen ausgemaach:

"Do gesäit ee kloer, datt déi elektresch e grousse Sprong gemaach hunn op 10 Prozent vun den neien Autoen. D'Plug-In-Hybriden och. Dann hu mer nach d'Hybriden, mat embarquéierter Technologie mat 16,3 Prozent."

Woubäi an dës lescht genannt Kategorie zum Deel och sougenannt Mild-Hybride falen, déi net reng elektresch kënne fueren. Elektresch Gefierer goufen der zejoert iwwregens sou vill ugemellt wéi an all de Jore virdrun zesummen.

Beim Bensinner a beim Diesel weist den Trend bei den Umeldunge kloer no ënnen, woubäi déi thermesch Gefierer awer nach ëmmer 2/3 vun den ugemellten Neiween ausmaachen.

D'Emissioune sinn sou niddereg ewéi nach ni, ob een elo déi al NEDC oder déi nei WLTP-Rechnung applizéiert.

"Allgemeng kann ee soen, datt de Fuerpark e gutt Stéck méi propper ass wéi nach virun e puer Joer an dat wéinst den neien Technologien, déi bei all Carburant an den Asaz kommen."

Fir datt d'Elektroziler kënnen erreecht ginn, muss de Staat awer nach Efforte maachen, sou de President vun der Autosfederatioun Fedamo, de Philippe Mersch.

"Ouni den Ausbau vun der Infrastruktur a vum Netz an der Verlängerung vu finanziellen Ureizer kënnen dës Ziler net annähernd erreecht ginn. Dat ass ganz kloer."

Mangel un Chippen? Et soll ee sech keng Suerge fir den Autosfestival maachen

Firwat muss een den Ament esou laang waarden, wann ee sech e neien Auto wëll zouleeën? D'Ursaach ass séier erkläert, et sinn d'Mikrochippen, déi an den Autoe verbaut sinn. Awer net nëmmen an den Autoen. Och Kichenapparater, Handyen an aneren elektronesch Apparater si betraff. Dofir gëtt et eng Lëscht mat prioritäre Besoinen déi decidéiert, wat fir eng Industrie als éischt geliwwert kritt.

Den Autofestival 2022 steet virun der Dier
Wat fir een Impakt hat d'Pandemie op d'Autosbranche? Wat ass den Ament am meeschte gefrot, Occasioun Autoen oder fonkelneier?