Dat ass ee vun de Constate vun enger Ëmfro, déi d’Chambre des Métiers zesumme mam ACL gemaach huet.

D’Resultater goufen en Dënschdeg op enger Pressekonferenz presentéiert. Datt iwwer 90% vun den Handwierksbetriber nach ëmmer net op d'Elektromobilitéit zréckgräifen, hätt seng Grënn.

Elektromobilitéit am Artisanat/Reportage Claudia Kollwelter

Ee vun de Problemer wieren do zum Beispill d'Bornen. Eigentlech sollten dës, bis 2020, fäerdeg uechter d'Land installéiert sinn. Bis ewell wieren awer just 2/3 realiséiert, bedauert den Direkter vum ACL, de Jean-Claude Juchem.

"D'Zuel vu Bornen, déi vum Staat geplangt sinn, geet net duer, fir de grousse Volume vum Fuerpark ze zerwéieren an och de Frontaliere Rechnung ze droen. Mir ginn dovun aus, datt d'Quantitéit dat 10- bis 15-facht misst sinn."

Donieft missten d'Infrastrukturen och weider developpéiert ginn.

"Mir hu kloer festgestallt, datt e grousse Schwaachpunkt bei de Residenzen oder Koproprietéiten ass, wou eis Mataarbechter wunnen. Wann een do eng Borne wëll, muss d'ganz Koproprietéit hiren Accord ginn. Wann dat net de Fall ass, ass et laangwiereg."

Et misst een dem Direkter vun der Chambre des Métiers Tom Wirion no awer och bedenken, datt et onsécher Zäite sinn, Stéchwuert Hausse vun den Energiepräisser an dofir géife Betriber och ofwaarden. Et dierft och net alles op eng Kaart gesat ginn, mee Alternative misste consideréiert ginn.

"Stéchwuert Hydrogen oder synthetesche Bensinn. Et muss een Technologie-oppe sinn an dofir taaschten d'Betriber sech un dee Sujet erun, wat net verwonnerlech ass, well eng Baufirma net onbedéngt Spezialist ass, wat Autoen ugeet."

D'Betriber missten deemno och uerdentlech berode ginn. Donieft fuerderen den ACL an d'Chambre des Métiers, datt d'Primm "Clever fueren" iwwert den 31. Mäerz 2024 eraus verlängert gëtt.