Nodeems et en Dënschdeg keng Majoritéit fir deen neien Deal gouf, gouf et e Mëttwoch den Owend och keng Majoritéit fir e Brexit ouni Ofkommes.

En Donneschdeg soll dat britescht Parlament elo driwwer ofstëmmen, ob d'Regierung ufroe soll, fir de Brexit ze verréckelen.

Déi Fro ass elo néideg, well et am britesche Parlament weder eng Majoritéit fir de liicht iwwerschafften Deal gouf, nach eng fir en Austrëtt aus der EU ouni Deal, also e sougenannten haarde Brexit oder en No-Deal-Brexit.

Dat britescht Parlament hat en Dënschdeg mat 391 zu 242 Stëmmen jo och den nogebesserte Brexit-Accord refuséiert.

E Mëttwoch den Owend gouf et dunn eng hauchdënn Decisioun: 308 Stëmme ware fir an 312 Stëmme géint en EU-Austrëtt ouni Accord. Also just 4 Stëmmen Ënnerscheed, déi zu Gonschte fir e Brexit mat Deal, also géint en No Deal, entscheet hunn ...

Am Europaparlament hate sech e Mëttwoch vill Deputéiert driwwer opgereegt, dass ee vu London ëmmer nëmmen héiert, wat d'Parlament net wëll, mä net, wat et dann eigentlech gären hätt. D'Fraktiounscheffe vun de Chrëschtdemokraten an de Sozialdemokraten hunn derfir plädéiert gehat, dass London een zweete Brexit-Referendum organiséiert.

D'EU-Kommissioun huet zeréckhalend op de Votte vun e Mëttwoch den Owend reagéiert. Fir en No-Deal vum Dësch ze kréien, géif et net duer goen géint een No-Deal ze stëmmen, mä et misst ee fir en Deal stëmmen, sou eng Spriecherin vun der Kommissioun. Et hätt een en Accord mat der britescher Premierministesch ofgemaach an d'EU wier bereet deen ze ënnerschreiwen.
De Chef vun der oppositioneller Labour-Partei, Jeremy Corbyn, huet nom Vott gefuerdert, dass elo d'Parlament d'Kontroll misst iwwerhuelen. Hie géif elo Gespréicher féiere mat Deputéierte vun anere Parteien, fir eng Majoritéit fir ee Kompromëss ze fannen.
Haaptsträitpunkt ass de sougenannte Backstop fir Nordirland. Et handelt sech heibäi ëm eng Garantie, fir eng oppe Grenz tëscht dem EU-Staat Irland an dem briteschen Nordirland. D'Reegelung gesäit vir, dass Groussbritannien an enger Zollunioun mat der EU bleift, bis eng besser Léisung fonnt ass. Brexit-Hardliner fäerten allerdéngs, dass op déi Manéier d'Land laangfristeg un d'EU gefesselt ass an eng eegestänneg Handelspolitik net méiglech ass.

Äntwert op parlamentaresch Fro

437 Britte sinn op de Wielerlëschte fir d'Europawalen ageschriwwen. Ma wa Groussbritannien awer virum 26. Mee aus der Unioun ausgetrueden ass, däerfe just déi Leit wiele goen, déi nieft der britescher- och nach eng Nationalitéit vun engem EU-Memberstaat hunn.
Ënner anerem dat äntwert de Premier Xavier Bettel de Piraten, déi an enger parlamentarescher Fro d'Detailer gefrot haten.