En No-Deal-Brexit huet een e Mëttwoch am Vott ausgeschloss, en Donneschdeg geet Diskussioun zu Westminster weider.

Um 8 Auer en Donneschdeg den Owend eiser Zäit wëll een decidéieren, ob eng Verlängerung ugefrot gëtt oder ob een et sech awer vläicht nach eng Kéier anescht iwwerleet.

D'Theresa May huet e Mëttwoch alt nees eng Defaite kasséiert, déi 2. Defaite an 2 Deeg. Hir Autoritéit am House of Commons zu London ass, wann net ganz verschwonnen, ellen ugekraazt, esou d'Analys vun der BBC-Journalistin Laura Kuenssberg.

D'Decisioun géint en No-Deal Brexit koum e Mëttwoch iwwerraschend. Dat beweist de knappen Ecart vu 4 Stëmmen am éischte Vott. Iwwerraschend och wëll déi Konservativ vun der Regierung ënnert dem May gefrot goufen, fir den No-Deal ze stëmmen, fir d'staatlech Kontroll iwwert de Brexit-Prozess ze behalen. Dës Taktik goung an d'Box. De parteiinterne Support hëlt of. D'Aarbechts- a Pensiounsministesch huet kuerz nom Vott demissionéiert.

"Ma mat der Kris kënnt och d'Opportunitéit", esou e weidere Constat vun der Laura Kuenssberg. Déi britesch MPs kréie virum Vott en Donneschdeg den Owend en neie Choix proposéiert. Zeréck op den Deal, mat der Méiglechkeet, en Delai unzefroe bis den 30. Juni, fir déi néideg Legislatiounen duerch d'Parlament ze kréien. Oder et entscheet ee sech, fir e Verréckele vum Brexit unzefroen. "Keng Chance", seet de Michel Barnier, Chef-Negociateur fir d'EU.

De Brexit ze verréckelen ass nëmme méiglech, wann déi britesch Regierung dat gutt argumentéiere kann. Esou kann een d'Lëtzebuerger Positioun resuméieren. "Et muss e Grond ginn, wa mer eng nei Frist solle fixéieren", sot de Premier Xavier Bettel vis-à-vis vun der Noriichtenagence DPA.

Dat einfachst wier a sengen Aen, wann d'Britten en neie Referendum géifen organiséieren oder den Artikel 50 géifen zeréckzéien.

Wann et just ëm Zäit geet, ënnersträicht de Lëtzebuerger Regierungschef, da gëtt et keen Accord. Hie weist anengems drop hin, datt eng Verlängerung iwwert den 29. Mäerz eraus just unanime vun de 27 Memberlänner kann decidéiert ginn.

De Fall gesat, Groussbritannien ass den 23. Mee - dat ass den éischten Dag vun den Europawahlen - nach Member vun der Europäescher Unioun, da mussen a Groussbritannien och Walen organiséiert ginn.

De Xavier Bettel wënscht sech, datt seng britesch Homologin Theresa May nach virun Enn des Mounts eng Majoritéit fir den Austrëttsvertrag mat der EU kritt.

D'Lëtzebuerger Regierung géif sech weider op en haarde Brexit virbereeden. Et kéint ee elo net ofwaarden an Téi drénken.