Déi Gréng haten e Samschdeg Europakongress. D'Tilly Metz an de Meris Sehovic goufen als Kandidate fir d'Europawale mat 140 Jo géint 5 Nee-Stëmmen ugeholl.

Mat 140 Jo- zu 5 Neestëmmen goufen de Programm an d'Kandidaten, ugefouert vun der Europadeputéiert Tilly Metz an dem Meris Sehovic, Porte-Parole vun déi jonk Gréng a Mataarbechter am Europaparlament, ugeholl.

Déi Gréng - Europakongress
Programm a Kandidaten ugeholl, nei Parteispëtzt Bernard-Kmiotek gewielt.

Allen zwee sinn an hire Rieden op d'Erausfuerderungen agaangen. Europa braucht Äre Protest, dat war hire Message un déi Jonk. Si géingen op d'Strooss fir hir Zukunft. D'Tilly Metz huet drun erënnert, datt Europa virun allem e Friddensprojet wier an net e Wirtschaftsprojet. Déi demokratesch Grondsätz misste gestäerkt sinn, de Kampf géint Fakenews a géint Diskriminatioun. De Brexit wier e Beispill, wéi e Land mat bëllegem Populismus an de Chaos gestierzt géif ginn.

Reng Lëpsebekenntnisser géifen net méi duergoen, sot de Meris Sehovic. Et misst ee sech nei engagéieren, fir eis Zukunft a fir Europa. Ni wär d'Zukunft vun der Unioun esou onsécher gewiescht wéi haut.

Duo Bernard-Kmiotek un d'Parteispëtzt gewielt

Um Kongress vun deene Gréngen gouf e Samschdeg de Mëtteg och eng nei Parteispëtzt gewielt.

Den neien an ale Parteipresident Christian Kmiotek krut d’Ënnerstëtzung vun 118 Delegéiert. Et gouf 125 valabel Stemmen.

D’Djuna Bernard krut der 115 vun 122.

© Jeannot Ries

D'Deputéiert Djuna Bernard war déi eenzeg weiblech Kandidatin. De Christian Kmiotek hat fir seng eege Successioun kandidéiert. Hien hat zwee jonk Géigekandidaten: den David Gawlik an den Athanase Popov.