U sech war geplangt, dass d'Premierministesch Theresa May en Dënschdeg oder e Mëttwoch eng 3. Kéier iwwert de Brexit-Accord géif ofstëmme loossen.

Dat geet guer net, sot e Méindeg den Owend de Parlamentspresident John Bercow. Et misste schonn Ännerungen an de Projet kommen.

De Bercow huet am House of Commons op eng Reegel aus dem fréie 17. Joerhonnert verwisen, déi seet, datt eng an déiselwecht Virlag net x-mol zum Vott gestallt dierf ginn.

En neie Vott iwwer de Brexit-Deal ouni Ännerunge ass deemno net méiglech.

Op dës Decisioun war d'Regierung vun der Premierministesch Theresa May net preparéiert. De Parlamentspresident hätt d'Regierung viru senger Annonce am Parlament net virgewarnt, sou de Büro an der Downing Street. Wéi et aus Regierungskreesser heescht, wéilt den John Bercow wahrscheinlech erreechen, dass de Brexit bis op Weideres reportéiert gëtt, wärend dem d'Parlament de Prozess géif iwwerhuelen an et op een douce Brexit géif erauslafen.
De Brexit-Minister Barcley schléisst net méi aus, dass et um Enn guer keen EU-Austrëtt wäert ginn.

En Donneschden ass de Brexit ee vun den Haaptsujeten um Sommet vun de 27 EU-Staats-a Regierungscheffen. Am Virfeld heescht et, dass ee Verréckele vum Brexit nëmmen dann decidéiert ka ginn, wann een e klore Plang vu London op den Dësch geluecht kritt. Dat ass bis op Weideres net de Fall.