De Brexit gëtt no hanne verréckelt. Dat ass no laangen an zéie Verhandlunge en Donneschdeg zu Bréissel vun den 27 aneren EU-Memberstaaten decidéiert ginn.

Wat läit elo um Dësch a wouriwwer gëtt um Freideg geschwat? D'Annick Goerens mat den Detailer.

Wann dat  britescht Parlament déi nächste Woch den ausgehandelte Brexit-Deal unhëlt, da kréien d'Britte bis den 22. Mee Zäit fir gereegelt aus der EU erauszegoen. Sollt dat net de Fall sinn, an d'House of Commons refuséiert den Deal eng drëtte Kéier, da musse si bis den 12. Abrëll eng Decisioun op den Dësch leeën, op si bis dohinner den haarde Brexit duerchzéien oder awer un den Europawale participéieren. Donieft gëtt zu Bréissel nach an all Richtunge spekuléiert, d'Theresa May déi kéint zerécktrieden, Neiwalen a Groussbritannien an een zweeten Referendum iwwer de Brexit.
Dozou de Lëtzebuerger Premier Xavier Bettel:"Et ginn 100 verschidden Zeenarioen. Et gëtt och een Zeenario, dass nächst Woch zum Beispill d'Parlament decidéiert, dass si sech selwer ëm de Brexit këmmeren. Jo, do ginn et och Pisten, dass zu London een „House of Commons“ kann decidéieren de Brexit selwer ze negociéieren. An da vläicht mat anere Propositiounen ze kommen. Dat heescht fir eis ass et wichteg, dass mir elo mol Kloerheet kréien. Ech weess haut nach ëmmer net ganz genau wat ze zu London wëllen an et ass e bësse spéit.“

Duerch de Brexit ass den Agenda vum Fréijoerssommet nawell zolidd op d'Kopp geheit ginn. Dofir gouf dann um Freideg nogeholl, wat en Donneschdeg verpasst gouf. Dozou um Freideg de Moien den Éisträichesche Kanzler Sebastian Kurz: „Was ich gut finde, ist dass heute endlich einmal Themen der Wettbewerbsfähigkeit auf der Agenda stehen. Wir brauchen die Auseinandersetzung mit der Industriepolitik der Zukunft, mit Fragen des Freihandels, mit Fragen wie wir mit China und anderen Partnern auf der Welt umgehen. Denn nur wenn wir wettbewerbsfähig bleiben als Europäischen Unioun, dann können wir auch den Wohlstand und Arbeitsplätze sichern.“

Beschwat goufen och déi zukünfteg Relatioune mat Peking. Dat en Vue vum EU-China-Sommet Ufank Abrëll an iwwer déi europäesch Industriepolitik.

Een Thema iwwer dat méi laang geschwat gouf, war den europäesche Bannemaart. De Lëtzebuerger Premier Xavier Bettel: „Dat war fir eis och wichteg, dass mir iwwer d'Barrières intérieures sollten diskutéieren. Wéi een déi wierklech kéint ofschafen. Dunn hunn mer och gefrot, dass den Text vun der Kommissioun d'Basis sollt sinn. Mir brauchen d'Rad net nach eemol nei z'erfannen. Do si schonn Texter a Conclusiounen. Dorobber solle mer eis baséieren. Lëtzebuerg leit ënnert dëse Barrièren an dofir war et wichteg de Punkt ze maachen.“

AUDIO: De Xavier Bettel iwwert de Bannemaart


Och de Klimawandel war ee Sujet. Do huet sech de Premier awer éischter enttäuscht gewisen: „Zum Klimawandel hunn mer een Text den hätt kënne méi ambitiéis sinn. Mir haten och zu e puer Länner eng Propose gemaach, iwwer verschidde Punkten, iwwert d'Zil 1,5 Grad. An de Fait och, dass mer virun der UN, wou den Här Guterres eis invitéiert, fir op New York ze goen, fir iwwert de Klima ze schwätzen, eng gemeinsam Positioun brauchen. Am Text stoung dran, dass dat sollt am Joer statt fannen, dat hätt och kéinten Enn dës Joers sinn. Dat hunn mer elo geännert. Dat heescht, dass am nächste Conseil d'Ëmweltfroen och um Ordre du jour stinn an d'Klimafroen.  Dat heescht, dass mer och eng gemeinsam Positioun wäerten ausschaffen iert mer op New York ginn. Ech mengen, dass dat och am Interêt vun eis alleguer ass.“

AUDIO: De Xavier Bettel iwwert de Klimawandel

Den nächsten EU-Conseil ass, wann de Brexit net dertëscht kënnt, am Juni.