Am Parlament zu London gouf de Méindeg den Owend iwwert déi weider Strategie am festgefuerene Brexit-Sträit debattéiert.

Schonn zweemol gouf den EU-Accord, deen d'Theresa May a Bréissel ausgehandelt hunn, vun den Deputéierte verworf. Méiglecherweis kéint et dann en Dënschdeg een neien Ulaf ginn. Eng Majoritéit fir den Deal ass no Aussoe vum Finanzminister Philip Hammond awer och déi Kéier net a Siicht.

Am Virfeld hat déi britesch Premierministesch probéiert, Drock op d'Parlamentarier ze maachen. An engem Bréif huet si domat gedreet, en drëtte Vott ausfalen ze loossen, sollt si net genuch Support kréien.

Da misst Groussbritannien eng weider Rallonge fir den EU-Austrëtt zu Bréissel ufroen, wat allerdéngs géif bedeiten, dass d'Land bei den Europawale misst matmaachen. D'EU huet Groussbritannien proposéiert, de Brexit op den 22. Mee ze verleeën, wann d'Parlament den Accord dann unhëlt. Am anere Fall gëllt d'Rallonge just bis den 12. Abrëll.

E Sonndeg de Mëtteg koum d'Theresa May fir Konzertatioune mat verschiddene Regierungsmembere beieneen. Detailer vun de Gespréicher goufen dono awer keng genannt. Iwwert de Weekend hate britesch Medie gemellt, dass d'Premierministesch scho geschwë kéint vun hirer Regierung opgefuerdert ginn, zeréckzetrieden.

De Brexit stoung e Méindeg och am Mëttelpunkt vun der aussepolitescher Chamberkommissioun. De Premier Xavier Bettel hat de Méindeg de Mëtteg vu 14.30 Auer un d'Deputéiert vun dëser Kommissioun iwwert d'Decisiounen, déi a puncto Brexit d'lescht Woch um EU-Sommet zu Bréissel getraff goufen, informéiert.

Och en Dënschdeg beschäftegt sech d'Chamber mam EU-Austrëtt vu Groussbritannien. Um Programm vun enger ëffentlecher Sëtzung en Dënschdeg de Mëtteg stoungen dräi Gesetzprojeten, déi de Grand-Duché op en eventuell "haarde" Brexit solle preparéieren. Et geet méi konkret ëm Mesuren, déi am Zesummenhang mam Finanzsecteur musse geholl ginn.

AUDIO: Brexit an der Chamber / Reportage Claudia Kollwelter

D'Regierung misst sech och op en No-Deal preparéieren, waren d'Gedanke vum Laurent Mosar. Dat Ganzt muss een awer elo ganz séier iwwert d'Bühn kréien, wat verschidden Nodeeler matsechbréngt.D'Stéphanie Empain vun déi Gréng ass dogéint der Meenung, datt een eng gutt Aarbecht geleescht huet, well ee jo beim Brexit net ëmmer dat kritt, wat ee gären hätt. D'Regierung hätt an alle Beräicher alles gemaach, wat méiglech wier, fir sech ofzesécheren. A bis zum Datum vum Brexit wieren all déi wichteg Punkte gekläert.