Déi sechs aktuell Lëtzebuerger EU-Deputéiert hunn op déi lescht fënnef Joer zréck, an op déi nächst Legislaturperiod no vir gekuckt.

Een Thema huet e Méindeg de Moien eng méi kontrovers Diskussioun am Europahaus lassgetrëppelt: de sougenannte rietse Block, also nationalistesch Parteien aus diverse Memberlänner, déi d'Unioun vu bannen op d'Kopp dréine wëllen.

Den däitschen AFD-Spëtzekandidat Jörg Meuthen hat annoncéiert, dass déi Parteien, déi am EU-Parlament eng nei Allianz vun de Rietspopuliste grënne wëllen, ouni gemeinsame Programm bei den Europawalen untrieden. De Chef vun der italienescher Lega Nord Matteo Salvini hat op Mailand invitéiert, fir de Projet ze lancéieren. Nieft der AFD an der Lega ware just déi éisträichesch FPÖ, d'Finnenpartei an dänesch an estnesch Rietser komm. D'Marine Le Pen vum Rassemblement National, fréiere Front National, war net dobäi, och kee Victor Orban.

D'rietspopulistesch Parteie verdeelen sech den Ament op dräi Fraktiounen am EU-Parlament, well och si sech ënnerteneen op ville Punkten net eens ginn. Ee Beispill dofir wier d’Verdeelung vun de Flüchtlingen, seet den DP-Europadeputéierte Charel Goerens: “Wéi den Här Salvini gefrot huet, ob ee bereet wier, Flüchtlingen opzehuelen, hunn alleguer déi potenziell Kandidaten, fir mat hinnen zesummen eppes ze maachen, nee gesot. Si siche keng Eenegkeet, well Eenegkeet am europäesche Parlament sicht ee fir Léisungen ze fannen. Déi do siche keng Léisungen, déi do sichen just Problemer. Wéi den Här Gauland gesot huet: d'Flüchtlingskris, dat war e Kaddo fir meng Partei. Domat ass alles gesot!''

Net grad, fënnt d'Mady Delvaux vun der LSAP: ''Wat mech opreegt ass, dass déi Präsenz vun deenen.. wéi soll ech se nennen.. Supremisten, Nationalisten, Populisten.. méi grouss gëtt.''

Kompromësser fannen am Parlament géif doduerch méi schwéier ginn, esou d'Mady Delvaux. An et géif och d'Gefor bestoen, dass dat ganzt Parlament e Stéck no riets rutsche misst.

De Frank Engel, deen 2009 fir d'éischt Europadeputéierte fir d'CSV gouf, geet nach méi wäit. Och eng aner Institutioun kéint betraff sinn, seet de Frank Engel: ''Ech kéint mir duerchaus virstellen, dass den nächsten italienesche KommissärIn e Mënsch gëtt vun der Lega. Da muss ee kucken, wéi dat sech an anere Länner duerchdeklinéiert. Ungarn huet och nach e Kommissär ze gutt. Et ass net nëmmen am Parlament, wou et riskéiert, méi faarweg ze ginn.''

De Charel Goerens verweist sengersäits op d'Instrumenter vum Parlament, fir dat ze verhënneren: ''Wann dräi esou ''mouvais choucheur'en'' genannt gi vum nächste Kommissiounspresident, da kann d'Parlament déi Kommissioun refuséieren.''

D'Tilly Metz huet drop gehalen, den Däiwel net un d'Mauer ze molen: ''Wann déi progressistesch Parteien och kohärent zesummeschaffen, da kann een déi Gruppen, déi sech ënnerteneen och nach gutt streiden, an de Grëff kréien. Ech fannen, mir hunn elo scho bal ze vill an ze laang iwwert se geschwat.''

AUDIO: Band Riets Allianz EU-Deputéiert

Dauerbrenner Brexit

De komplizéierten Austrëtt vun de Briten aus der EU huet d'Aktualitéit déi lescht Zäit dominéiert. Eppes, wat déi sechs Deputéiert bedaueren. D'LSAP-Europadeputéiert Mady Delvaux sot et géif nerven, datt den Ament just iwwer de Brexit géif geschwat ginn an Europa. Et géif een an Europa och un anere Projete schaffen an och doriwwer misst ee schwätzen.

AUDIO: D'Mady Delvaux vun der LSAP

De Frank Engel vun der CSV huet iwwerdeems kloer gemaach, dass d'Verlängerung vum Brexit bis op den 31. Oktober keng gutt Léisung wär. An där Zäit wär et leider duerchaus méiglech, dass ee Brexit-Hardliner wéi de Boris Johnson d'Theresa May ofléist. Da wär et mat den Negociatiounen eventuell séier eriwwer, esou de Frank Engel. Senger Meenung no wär an Zukunft d'Haaptprioritéit d'Migratiouns- an d'Entwécklungspolitik vun der EU. Ëmmerhin huet d'Uno virausgesot, d'Populatioun um afrikanesche Kontinent kéint sech an Zukunft verduebelen. De Frank Engel huet betount, dass hien net wësse wéilt, wat an Afrika lass wier, wa bis 2,5 Milliarde Leit do wieren, well déi 1,2 Milliarde Leit vun elo hätte schonns ze wéineg.

AUDIO: De Frank Engel vun der CSV

En Dossier, dee virun allem der grénger Tilly Metz, awer och dem jéngste Lëtzebuerger Europadeputéierte Christophe Hansen um Häerz läit, ass d'Ëmwelt. D'Verbuet vu Plastiks-Stréihällem géif weisen, dass een eben heiansdo eppes verbidde misst, fir de Leit hir schlecht Gewunnechten ofzewinnen, esou sot de Christophe Hansen vun der CSV.

De 26. Mee sinn Europawahlen. Vun den aktuelle Lëtzebuerger EU-Deputéierte kandidéieren d'Tilly Metz, déi gréng, de Christophe Hansen, CSV an de Charel Goerens, DP, nach eng Kéier. D'CSV-Parlamentarier Frank Engel a Georges Bach an d'LSAP-Deputéiert Mady Delvaux ginn net méi mat.