Mir sinn houfreg och 2018, duerch eis Astellung zur Flüchtlingspolitik aus villen "illegale" Mënschen erëm "legaler" gemaach ze hunn, sou de J. Asselborn.

Eurostat huet en Donneschdeg Chiffere publizéiert, iwwert d’Asyl-Demanden an der EU, déi am leschte Joer positiv bewäert goufen.

Gutt 40% vun de positiven Decisioune goufen an Däitschland geholl. Dat huet Eurostat en Donneschdeg bekannt ginn. Domat hunn eis däitsch Nopere ronn 139.000 Migranten opgeholl. Hannendru kommen Italien a Frankräich. Allerdéngs war den Taux vun de positiven Decisiounen an Däitschland awer net am héchsten. Hei huet Irland d'Nues vir mat 85%, Lëtzebuerger kënnt mat 72% direkt hannendrun op déi zweet Plaz. Portugal kënnt mat 60% op déi drëtt Plaz. De Grand-Duché huet Eurostat no 1.000 vun am ganzen 1.390 Demanden op Asyl als positiv bewäert.
Op senger Facebook-Säit schreift den Ausseminister Jean Asselborn zu deenen Chifferen, dass hien houfreg wier, och 2018 nees duerch d’Lëtzebuerger Astellung zu der Flüchtlingspolitik aus villen „ illegale“ Mënschen nees  „legaler“ gemaach ze hunn, dat am Interessi vun eisem Land a well et eis mënschlech Flicht wier.

Lëtzebuerg bréicht net gewarnt ze ginn virun "illegaler Migratioun", ma de Grand-Duché misst sech an Uecht huele virun enger Partei, déi ëmmer méi mat riets-extremen auslännerfeindlechen Parole géif operéieren, fir falsch Angschtgefiller ze provozéieren, getrei der klassescher Gebrauchsanweisung vun auslännesche Parteie wéi der AFD, dem rassemblement national oder der italienscher Lega.