Viru genee 69 Joer gouf de Grondsteen fir d'Europäesch Unioun geluecht. Zu Éiere vum Robert Schuman gouf eng Gedenkplack ageweit.

Den 9. Mee ass ee besonneschen Dag fir Europa. Viru genee 69 Joer, den 9. Mee 1950, huet den deemolege franséischen Ausseminister Robert Schuman, déi sougenannten Schuman-Deklaratioun presentéiert an domat de Grondsteen fir d'Europäesch Unioun geluecht. Hien huet deemools d'Schafe vun enger Europäescher Gemeinschaft fir Kuel a Stol proposéiert. Zil war, dass d'Memberlänner dovun hir Kuel- a Stolproduktioun sollten zesummeleeën. No deene schlëmmen Erliefnisser am Zweete Weltkrich, sollt een neie Krich tëscht Däitschland a Frankräich onméiglech ginn. Frankräich, Däitschland, Italien, Holland, d'Belsch a Lëtzebuerg ware knapp ee Joer méi spéit d'Grënnungsmember vun der sougenannter Montanunioun. Et war déi éischt grenziwwerschreidend europäesch Institutioun.

Nach haut feiert d'Staategemeinschaft den 9. Mee als Europadag. Symbolesch kommen d'EU Staats- a Regierungscheffen, dorënner de Lëtzebuerger Premier Xavier Bettel, fir en EU-Sommet zu Sibiu a Rumänien beieneen.

Dësen Donneschdeg ass wéi gesot zu Lëtzebuerg fir d'éischte Kéier ee Feierdag um 9. Mee. De Grand-Duché huet an deem Sënn eng Virreiderroll an der EU iwwerholl. A kengem anere Land ass op dësem 9. Mee Feierdag.

Um Europadag ass och en Europafest, dëst am Gedenken un de Robert Schuman. Virum Gebuertshaus vum Papp vum Europäesche Gedanken a Clausen an der Rue Jules Wilhem, war um 11 Auer eng Gedenkzeremonie. Ënnert anerem huet d'Presidentin vum Mouvement Européen Astrid Lulling eng Ried gehalen. A Präsens vun enge sëllechen Éieregäscht gouf dono am Parc vum Robert Schuman sengem Gebuertshaus eng Gedenkplack devoiléiert.

Europafest zu Schengen

Wa mer un en oppent Europa denken, denke mer besonnesch och u Schengen. D'Duerf un der Musel wat dem Schengener-Accord, fir en Europa ouni Grenzen, säin Numm ginn huet.

Mä och hei soll den europäesche Gedanke net stoe bleiwen. Dofir hunn um Europadag 12 Buergermeeschter aus dem Dräilännereck en Accord fir Kultur an Tourismus ënnerschriwwen. D'Leit aus der Regioun solle net nëmmen nieft a beienee liewen, mä an Zukunft och méi matenee kënne maachen. De Responsabelen ass opgefall, datt d'Vernetzung tëscht de Gemengen net esou gutt ass, wéi se kéint sinn. Nieft enger Plattform fir Informatiounen iwwert d'Regioun sollen elo och verstäerkt d'Schoule mat an de Projet agebonne ginn.

Europadag op der Plëss

Och op der Plëss gëtt den Europadag de ganzen Dag iwwer gefeiert. Ënnert anerem gouf en Europäescht Duerf mat enge sëllechen Informatiounsstänn opgeriicht an et sinn de ganzen Dag iwwer Concerten an aner Spektakelen déi opgefouert ginn. Héichpunkt war um 14 Auer, wéi den traditionellen Europa-Kuch opgeschnidde gouf.

RTL

© Lynn Cruchten

VIDEO: Wéi fannen d’Leit deen neie Feierdag am Joer?
Ass et berechtegt, dass mir fräikréien, fir den Europadag ze feieren? D’Meenunge ginn do auserneen.