Eng Woch virun den Europawale waren um Sonndeg queesch duerch Europa Demonstratioune géint den Nationalismus geplangt.

Kuerz virun den Europawalen hunn e Sonndeg an Däitschland zéngdausende Leit géint den Nationalismus demonstréiert. Den Organisateuren no waren iwwer 150.000 Demonstranten zu Berlin an a sechs aneren däitsche Stied op der Strooss, ënnert dem Motto "Ein Europa für alle - Deine Stimme gegen Nationalismus". D'Bündnis "Ein Europa für alle", zu deem iwwer 400 verschidden Organisatioune gehéieren, hat zu de Protester opgeruff. Och an aneren europäesche Stied gouf e Sonndeg géint den Nationalismus protestéiert.

E Samschdeg hate sech zu Mailand, nom Appell vum italieneschen Inneminister Matteo Salvini dausende Leit versammelt fir géint Europa ze protestéieren. A Riede gouf vun engem "Europa vun den Elitten" an der Vergaangenheet geschwat, et gouf Stëmmung géint d'Awanderung, den Islam a Bréissel gemaach. Ënnert anerem hate sech de Geert Wilders vun der hollännescher Fräiheetspartei an den Jörg Meuthen vun der AfD op Mailand deplacéiert. D'Marine Le Pen vum Rassemblement national huet an hirer Ried vun enger "Super-Fraktioun" am Europaparlament geschwat. Eng Dose rietspopulistesch an nationalistesch Parteien hu jo wëlles am Parlament esou eng Fraktioun ze bilden. Domadder kéint déi éischte Kéier bannent Joerzéngten den europäeschen Opbau verännert ginn, huet d'Marine Le Pen gemengt.