Piratepartei, KPL an Déi Konservativ ginn net un, wéi vill se op Facebook bezuelen, fir datt hir Artikelen méi Leit sollen erreechen.

De weltwäit gréisste soziale Reseau hat no der fermer Kritik iwwert Wahlmanipulatiounen op Facebook eng nei Optioun entwéckelt. Parteien an aner Organisatiounen kënnen elo uginn, datt se politesch op Facebbok ënnerwee sinn an an deem Fall kënnen d’Utilisateuren verifiéieren, wéi vill d‘Parteie fir Publicitéit op Facebook ausginn. Donieft garantéiert deen neie System vu Facebook, datt d’Partei d’Pub finanzéiert a keen Drëtten an et gëtt ausgeschloss, datt d’Finanzéierung aus dem Ausland kéim.

Ma d'Piratepartei, d'KPL an Déi Konservativ ginn awer net un, wéi vill se op Facebook bezuelen, fir datt hir Artikelen méi Leit sollen erreechen.

Nozeliesen am „Facebook Ad Library report“ (https://www.facebook.com/ads/library/report/)ass:

Am meeschte bezuelt hätten déi lescht 30 Deeg déi Gréng, mat alles an allem iwwer 15.000 Euro. Dono kéim d'LSAP mat ronn 8.000 Euro.

Méi wäit hannendru kéimen Déi Lénk mat knapps 1.300 Euro, d’DP mat bal 1.200 Euro an d’CSV mat bësse méi wéi 1.000 Euro.

D'ADR huet offiziell manner wéi 100 Euro ausginn, de Wee2050 och nach emol 180 Euro. Volt dann hätt 178 Euro ausginn.

Bei de Pirate stinn 190 Euro, mee hir Pub wier ouni «Disclaimer» gefuer, dat heescht ouni Verzichtsdeklaratioun.

Anescht wéi bei de Chamberwalen am Oktober haten d’Parteie fir d’Europawale keen Accord ënnerzeechent, fir sech u Reegelen ze halen, hat den 100,7 am Abrëll gemellt.