Eigentlech hat London zougesot, hiren Undeel u finanziellen Decisiounen, déi bannent der EU geholl gi waren, nom Austrëtt aus der EU nach ze bezuelen.

De Favorit op de Poste vum nächste britesche Premier Minister huet awer elo an engem Interview mat der Sunday Times, ugekënnegt, déi 44 Milliarden Euro sou laang net ze bezuelen, bis et besser Konditioune fir Groussbritannien a méi Kloerheet iwwer déi nächst Schrëtt géing ginn. Hien hätt et ëmmer komesch fonnt, e Scheck z'ënnerschreiwen, iert een decisiven Accord ofgeschloss wär, sou den Johnson.

Schonn den amerikanesche President Donald Trump hat lescht Woch de Britte recommandéiert, einfach net ze bezuelen an huet och gemengt, den Johnson hätt a sengen An, excellent Fäegkeeten fir nächste Partei- a Regierungschef ze ginn.

Hunt: Nei Verhandlunge mat EU méiglech

Déi däitsch Kanzlerin Angela Merkel hätt ugedeit, dass d'EU eventuell bereet wier, de Brexit-Accord nei ze verhandelen. Dat sot den Jeremy Hunt dem Norichtesender SkyNews.

Den Hunt ass den aktuelle briteschen Ausseminister a Kandidat fir d'Relève vum Theresa May als Premier Minister z'iwwerhuelen. Hien hätt bei der Gedenkfeier um D-Day lescht Woch mat der Kanzlerin geschwat an ass iwwerzeegt, dass et méiglech wier, den Accord, dee bis ewell um Dësch läit, ze änneren.

Allerdéngs huet hien net präziséiert, ob vum Accord selwer oder der politescher Deklaratioun, déi zum Accord gehéiert, rieds war. Bis ewell hat d'EU nämlech ëmmer erëm betount, dass den Text vum Accord net méi kéint geännert ginn.

D'Deklaratioun par konter kéint iwwerschafft ginn, sollt Groussbritannien seng Positioun substantiell änneren. D'Angela Merkel huet sech bis ewell nach net ëffentlech zum Hunt sengen Aussoe geäussert.