D'Verhandlungen ëm d'Successioun vum Jean-Claude Juncker als EU-Kommissiounschef an d'Besetzung vun anere Spëtzeposten an der EU goufen nees ënnerbrach.

Zu Bréissel gëtt et nach ëmmer keng Decisioun iwwert d’EU-Spëtzeposten. De Marathon-Spezial-Sommet gouf ënnerbrach an ass op en Dënschdeg de Moien 11 Auer reportéiert ginn.

AUDIO: EU-Sommet: Verhandlunge verluecht / Reportage Fanny Kinsch

Et läit wuel eng nei Propositioun um Dësch, ma domat ass och nach net jiddereen zefridden. Virun allem Polen wiert sech nach ëmmer géint de sozialdemokratesche Spëtzekandidat Frans Timmermans als Kommissiounspresident. An et ass nach net kloer, ob et fir eng qualifizéiert Majoritéit duergeet, och wann de Package, deen elo um Dësch läit, der Gender Balance an der Geographie e bësse méi Rechnung dréit, wéi de sougenannten Osaka-Deal, deen am Ufank vun de Verhandlungen als Ausgangsbasis gegollt huet.

Deemno soll an dësem neie Pack de sozialdemokrateschen Hollänner Frans Timmermans nach ëmmer Kommissiounspresident ginn, mat der dänescher Liberaler Margrethe Vestager als Vizepresidentin. Den däitschen EVP-Spëtzekandidat Manfred Weber soll Parlamentspresident ginn, eventuell géif hien an der Hallschent vum Mandat vum liberale Belsch Guy Verhofstad ofgeléist ginn. En anere belsche Liberalen, de Charles Michel, soll Aussebeobtrachte ginn an déi EVP-no bulgaresch Politikerin an aktuell Presidentin vun der Weltbank Kristalina Georgieva Conseilspresidentin. Ee vun de Kritikpunkten un dësem neie Package ass, datt en ze vill Benelux-lastesch ass.

No enger kuerzer Berodungspaus hate sech déi 28 géint 10.30 Auer e Méindeg de  Moien nees zesummegesat, ma de Conseilspresident Donald Tusk huet de Sommet dunn ofgebrach an op en Dënschdeg 11 Auer reportéiert, nodeems hien elo iwwer 24 Stonnen um Stéck verhandelt huet. E Sonndeg ëm dës Zäit souz hien nämlech scho mam Parlament zesummen, fir hiert Uleies ze héieren.

De Sommet hat jo e Sonndeg den Owend kuerz no 21 Auer ugefaangen, war awer schonn eng gutt Stonn méi spéit fir bilateral Gespréicher ënnerbrach ginn an huet eréischt e Méindeg de Moie kuerz virun 8 Auer erëm ugefaangen. Et sinn éiweg Verhandlungen, bei deene jidderee seng Muskele spille léisst. Et kann een hei vu Kouhandel schwätzen, ma et ass am Fong ähnlech, wéi bei Koalitiounsverhandlunge fir eng Regierung. Et geet ëm wichteg Posten, an all Partei muss Kompromësser agoen. Et wier allerdéngs gutt, wa se sech dann en Dënschdeg géifen eens ginn, well e Mëttwoch wëll d’Parlament egal wéi hire President stëmmen.

An der franséischer Delegatioun geet Rieds vun enger Kris tëscht der Bundeskanzlerin Angela Merkel an der Europäescher Vollekspartei.

D’Angela Merkel, den Emmanuel Macron, de Pedro Sanchez an de Marc Rutte ware sech um G20-Sommet zu Osaka iwwert de Frans Timmermans eens ginn. Den Emmanuel Macron huet awer scho gesot, et misst een hei flexibel sinn, wann een um Dënschdeg wéilt zu engem Duerchbroch kommen. Et soll nämlech och evitéiert ginn, d’Spëtzeposte mat Leit besetzen, déi net vu groussen EU-Memberstaaten ënnerstëtzt ginn.

De Lëtzebuerger Premier Xavier Bettel sot no der Ënnerbriechung vum Sommet, datt et net einfach wier, esou ee Schema zesummenzebréngen. Iwwerdeems wier eng grouss Partei ënnert sech net eens.

Et ass och net kloer, wien nächsten EU-Conseilspresident gëtt. De Lëtzebuerger Premier Xavier Bettel hat e Sonndeg den Owend nach emol kloer gemaach, dass hie fir dee Posten net géif a Fro kommen.

AUDIO: De Premier Xavier Bettel steet net zur Verfügung