Éischt Decisiounen, wat déi europäesch Spëtzeposten ugeet, sinn um Dënschdeg den Owend gefall. Reaktioune vum Xavier Bettel a Jean-Claude Juncker.

AUDIO: Decisioun um EU-Sommet: De Reportage vum Fanny Kinsch

De Poker ëm d'Spëtzeposten an der EU ass eriwwer. Déi däitsch Verdeedegungsministesch Ursula von der Leyen gouf als éischt Fra vum EU-Conseil un d'Spëtzt vun der EU-Kommissioun nominéiert. Elo muss just nach d'EU-Parlament iwwer d'Decisioun ofstëmmen. De belsche Premier Charles Michel gouf fir de Poste vum Donald Tusk als nächste Rotspresident envisagéiert. Déi aktuell franséisch Cheffin vum Internationale Wärungsfong Christine Lagarde soll vu Washington zeréck an Europa komme fir nei Presidentin vun der europäescher Zentralbank ze ginn. Neien EU-Aussebeoptraagte kéint de spueneschen Ausseminister Josep Borrell ginn, den dann de Sëtze vum Federica Mogherini iwwerhëlt. Wei gesot, all dës Decisioune goufen vum EU-Conseil geholl. D'Parlament muss awer nach iwwert de Kommisiouns- an d'Parlamentspresidenten ofstëmmen. Um Mëttwoch steet d'Wiel vum Parlamentspresident um Programm, iwwert d'Kommissiounspresidentin gëtt méi spéit ofgestëmmt, nodeem déi den Tour vun de Fraktioune gemaach huet.

D'Léisung an de Marathon-Verhandlunge koum nodeems den EVP-Spëtzekandidat Manfred Weber matgedeelt huet, dass hie géing op de Poste vum Kommissiounspresident verzichten. Dofir kéint hien awer President vum EU-Parlament fir 2,5 Joer ginn. Déi éischt 2 an een hallef Joer soll awer een Sozialdemokrat d'Parlament regéieren. En Dënschdeg de Mëtteg war do de Numm vum Bulgar Sergej Stanishew genannt ginn. Confirméiert ass dat awer net.

De Sozialist Frans Timmermans an déi Liberal Margrete Vestager kéinte sech iwwerdeems de Poste vum Vizepresident vun der EU-Kommissioun deelen.

D'Angela Merkel huet sech iwwregens wéinst dem däitsche Koalitiounsaccord musse beim Vott fir d'Ursula von der Leyen als nei Kommissiounspresidentin enthalen.

VIDEO: Reaktioun vum Jean-Claude Juncker
...

Fir de Moment ännert sech mol näischt un der Zuel vun den EU-Parlamentarier, de Brexit léisst jo nach op sech waarden a sou si weiderhin 751 Deputéiert am Europaparlament.

D'EVP bleift déi stäerkste Fraktioun. Mä et geet awer net méi duer, fir eng absolut Majoritéit zesumme mat de Sozialdemokraten, der zweetstäerkster Kraaft. Béid Parteien hu Sëtz verluer.

VIDEO: Reaktioun vum Xavier Bettel
...

Déi Liberal – mam Macron senger „République en marche“ - sinn elo déi drëttstäerkste Fraktioun. Och déi Gréng gi sech selbstbewosst, déi Däitsch Ska Keller hat souguer och fir de Poste vun der Parlamentspresidentin kandidéiert.

D'Parteie vum rietse Bord hate bei den Europawalen zougeluecht, awer net sou staark wéi vu Säite gefaart gi war. Eng Zort „Super-Fraktioun“ vun alle rietsen an europakritesche Kräfte koum awer net zustanen.

Dënschdes virun der Decisioun: Xavier Bettel am Interview

Ënnert de Staats- a Regierungscheffen ass déi lescht Deeg iwwert eng Verdeelung vun de Spëtzeposten diskutéiert ginn, bei där de Manfred Weber géif Parlamentspresident ginn. Déi Gréng am Europaparlament hunn en Dënschdeg de Moien offiziell annoncéiert, datt déi däitsch Ska Keller hir Kandidatin fir d’Presidence vum Parlament ass. Déi Annonce géif d’Verhandlungen am Conseil net beaflossen, sot de Lëtzebuerger Premier Xavier Bettel en Dënschdeg de Moie bei senger Arrivée zu Bréissel.

"Et geet net nëmmen ëm d'Parteien, et geet wierklech och ëm d'Geografie, et geet ëm den Gender, et geet ëm grouss Länner, méi kleng Länner. All déi Froe musse gekläert ginn an dat solle mer wierklech elo do uewe maachen, mä ech mengen et wier awer scho wichteg, dass do, wou de Conseil och d'Initiativrecht huet, fir iwwert déi eng oder aner Nominatioun ze maachen. Haut géif weisen, dass mer verstänneg sinn an och eens sinn, an dass d'Europaparlament da scho weess, och en Connaissance de causes wa si wielen, wat bei eis als Decisioun geholl ginn ass."

En anert Thema, dat den Ament an Europa fir eng passionéiert Diskussioun suergt, ass de Fall vun der Carola Rackete, der Kapitänin vun engem Rettungsschëff. Hir gëtt jo an Italien de Prozess gemaach, well si illegal am Hafe vu Lampedusa ugeluecht huet, fir datt Mënschen, déi aus dem Mëttelmier gerett goufen, u Land kéinte goen. Et kéint net sinn, datt 2019 eng Persoun, déi Mënscheliewe rett an de Prisong kënnt, sot dozou de Premier Xavier Bettel. Hien hätt säin italienesch Homolog awer nach net dorop ugeschwat.