E Mëttwoch de Moien um 9 Auer huet de Vott ugefaang. Am zweeten Tour krut den Italiener David Sassoli d'Majoritéit vun de Stëmmen.

D'Europaparlament huet en neie President. Den Italiener David Sassoli vun den Sozialdemokrate krut beim zweete Vott am fréie Mëttwochnomëtten 345 Stëmmen. 667 Europadeputéiert haten e gëltegen Walziedel ofginn.

Europa Parlament: David Sassoli gëtt neie President
E Mëttwoch de Moien um 9 Auer huet de Vott ugefaang. Am zweeten Tour krut den Italiener David Sassoli d'Majoritéit vun de Stëmmen.

Den italienesche Sozialdemokrat huet eng Majoritéit vun 334 Stëmmen gebraucht, déi hien elo erreecht huet. Zweetgewielten ass mat 160 Stëmmen den Jan Zahradil vun der Fraktioun vun de EU-skepteschen Europäesche Konservativen a Reformer.

AUDIO: Neie President fir d'Europaparlament - Reportage Pierre Jans

Den 63 Joer ale Fernsehjournalist Sassoli iwwerhëlt domadder d'Successioun vum italienesche Chrëschtdemokrat Antonio Tajani, a soll an der éischter Hallschent vun der Legislatur de Virsëtz vum Europaparlament iwwerhuelen.
Dono gëtt dann e Kandidat vun de Konservativen EU-Parlamentspresident.

De Sassoli konnt sech géint déi Däitsch Ska Keller vun der grénger Fraktioun, d'Spuenierin Sira Rego vun der Lénkspartei an den Tschech Jan Zahradil.

Beim éischten Tour goung et fir den David Sassoli ëm 7 Stëmmen net duer. Eng Partie Deputéiert hunn an enger Kaffispaus du missten iwwerzeegt ginn, hir Meenung ze changéieren an awer fir den Sassoli ze votéieren. Et war ze erwaarden, dass beim zweete Vott en neie President fonnt géif ginn.

De Sozialdemokrat David Sassoli konnt bei der Wal op d'Ënnerstëtzung vun der chrëschtlecher Vollekspartei a vun de Liberalen zielen. Déi nei liberal Lëtzebuerger Deputéiert Monica Semedo erkläert: ''Mir duerften den Här Sassoli de Moie virun der Ofstëmmung nach gesinn. Hien huet eis seng Prioritéiten erkläert an mir konnte Froe stellen. Mir waren eis du séier eens, dass hien de Favorit vun eise liberaler Fraktioun ass. Mir hoffen, dass en dat ëmsetzt, wat e gesot huet: méi Transparenz, e Wandel vum europäesche Parlament an och eng besser Kommunikatioun mam Bierger.''

Fir d'EVP ass den David Sassoli en Deel vun engem Personal-Tableau, bei deem si um Ënn de Poste vum Kommissiounspresident krut. Gemëschte Gefiller bei der neier Lëtzebuerger Deputéierter Isabel Wiseler: ''Ech ka schwéier akzeptéieren, dass de System vum Spëtzekandidat esou a Fro gestallt ginn ass. Do huet de Conseil eng Roll gespillt déi ech net korrekt fannen. Wann awer Punkte blockéiert sinn an een net weiderkënnt, da muss een e Kompromëss fannen. Dat ass d'Responsabilitéit vun engem Politiker.''

Déi Gréng Fraktioun hat dogéint selwer eng Kandidatin an d'Course geschéckt. D'Ska Keller koum beim zweeten Tour op 119 Stëmmen, D'Sira Rego vun der Lénkspartei krut 43 Stëmmen. 160 Stëmme waren et um Ënn fir den Jan Zahradil vun der Fraktioun vun de EU-skepteschen Europäesche Konservativen a Reformer, zwou Stëmme manner ewéi beim éischten Tour.

Den David Sassoli bleift elo fir d'Halschent vun der Legislaturperiod, also zweeanenhalleft Joer de President. Hei de Schluss vu senger Ried nom Resultat: „Wann d’Parlament op Ängschten vun de Bierger lauschtert, souguer hir Roserei mee virun allem hir Besoinen, da sinn sech ech sécher, datt Dir all kënnt hëllefen Europa besser ze maachen. Zesumme kënne mer erfollegräich sinn.

Duerno soll d'Mandat un een Kandidat oder eng Kandidatin vun der EVP weidergoen. Ma zu deem Zäitpunkt wäert d'Europaparlament dann nach eng Kéier ofstëmmen.

AUDIO: Neien Europaparlamentspresident / Reportage Pierre Jans

Hien ass (indirekt) Deel vum Personalpak mam Ursula von der Leyen, deen d‘28 Staats- a Regierungscheffen en Dënschdeg zu Bréissel zeréckbehalen hunn. D’Von der Leyen, déi proposéiert gëtt, fir d’Spëtzt vun der EU Kommissioun ass e Choix, deen zu Strossbuerg weider fir Onzefriddenheet suergt.

''Ech hätt och gären eng Äntwert, wéi d'Madamm von der Leyen an d'Spill komm ass. Wann een am Nomëtteg bemol héiert, okay, do ass eng Kandidatin, déi nach guer net am Gespréich war virdrun, da wëll ech eng Erklärung hunn, wéi et dozou komm ass? Firwat sech fir d'Madamm von der Leyen entscheet gouf. An da musse mir kucken, ob mir déi Besetzung mat droen kënnen" esou d'Monica Semedo.

An engem Communiqué reegt sech och d'LSAP doriwwer op, datt de System vum "Spëtzekandidat" net respektéiert gouf.

Kuerz no 9 Auer hat d'Sëtzung ugefaangen

D'EU-Deputéiert hunn de Choix tëscht 4 Kandidaten. Virum Vott hat all Kandidate fënnef Minutten, fir sech ze presentéieren.

Als éischt Kandidatin huet Ska Keller vun déi Gréng sech nach eng Kéier un d'Deputéiert riichten dierfen. Si huet de Wieler Merci gesot, dass si bei der Europawal hir Stëmmen ofginn hunn. D'Ska Keller huet awer och betount, dass d'Parlament sech hire President net däerf vun de Staats-a Regierungscheffe virschreiwe loossen, déi jo en Dënschdeg en Personal-Tableau fir déi international Spëtzeposten decidéiert haten. Dat wär net dat richtegt Signal un d'Wieler. D'Kandidatin vun déi Gréng wëll sech dofir asetzen, dass d'EU-Parlament seng Kredibilitéit verdeedegt.

D'Lénkspartei huet d'Spuenierin Sira Rego an d'Course geschéckt. Si huet d'Rechter an d'Wuel vun den Aarbechter an de Mëttelpunkt gestallt. D'Rechter vun de Fraen an d'Gläichstellung tëscht Fra a Mann huet si och ervirgehuewen. Dorop huet hir Fraktioun applaudéiert.

Dunn war et den Optrëtt vum Sozialdemokrat David Sassoli aus Italien. De fréiere Journalist gëtt als Favorit op de Poste vum President gehandelt. Ëmmerhin huet hien d'Ënnerstëtzung vun der EVP. E Sozialist soll nämlech fir déi éischt zweeanenhallef Jore President ginn, fir déi zweet Halschent géif de Posten dann un e Kandidat vun der EVP weidergoen. Mä fir de Vott ze gewannen, bréicht den Sassoli nach Stëmmen aus anere Fraktiounen. D'chrëschtlech Vollekspartei an d'Sozialdemokraten hu keng Majoritéit am Parlament. Wahrscheinlech kann den sozialdemokratesche Kandidat awer op de Support vun de Liberalen zielen.

Als véierten huet den Kandidat vun der Fraktioun vun de EU-skepteschen Europäesche Konservativen a Reformer geschwat, den Tschech Jan Zahradil. Zu där Fraktioun gehéieren och d'Deputéiert vun de briteschen Tories an der polnescher Regierungspartei PiS. Den Zahradil huet méi Balance tëscht den Europäeschen Institutiounen an den nationale Regierunge gefuerdert.

Et war eng besonnesch Stëmmung en Dënschdeg

Vill Deputéiert ware permanent um Handy, wollte gewuer ginn, wat zu Bréissel den neiste Stand ass. Op de Gäng gouf iwwer d'Nimm diskutéiert. Virun allem wou du kloer gouf, dass den Rotspresident Donald Tusk d'Ursula von der Leyen als Kommissiounspresidentin proposéiert. De Sozialist Frans Timmermanns wär an deem Tableau net méi fir dee Poste virgesinn. Onzefriddenheet beim Lëtzebuerger Deputéierten Nicolas Schmit: "Ech ka mech wierklech net ganz zefridden domat erkläre mat deem Package deen elo jo anscheinend do ficeléiert ginn ass. Ech kommen elo aus engem Grupp vun de Sozialdemokraten, wou och eng grouss Onzefriddenheet vu praktesch jidderengem expriméiert gouf."

D'EVP dogéint huet op de System vun de Spëtzekandidate gehalen. D'Ursula von der Leyen war net Spëtzekandidatin, erkläert de Christophe Hansen: "D'EVP hätt am Léifste gehat, eise Spëtzekandidat de Manfred Weber hätt dës Positioun kënne kréien. Domat war de Conseil awer kloer net averstanen. Grad esou wéi e mam anere Kandidat Frans Timmermans net averstane war. Fir eis ass et net déi ideal Solutioun mä et ass awer eng déi eisen Uspréch gerecht gëtt."

Um Dënschdeg den Owend koum dann och d'Nouvelle, datt de Manfred Weber säin Usproch op d'Amt vum EU-Kommissiounspresident opgëtt. "Hier hat meine Reise im letzten September als Spitzenkandidat begonnen, hier endet sie", sot de Weber an der Fraktiounssëtzung vun der EVP.

De liberalen Deputéierte Charel Goerens huet betount, dass d'Parlament d'Resultat vun deem Kouhandel vum EU-Conseil net akzeptéiere muss, mä selwer Stäerkt beweise soll. Dat heescht, dass d'Deputéiert fir sech selwer decidéiere sollen: "D'Parlament huet an enger Legislaturperiod am Fong dräi Mol eppes ze soen: deen Dag, wou de President hei am Parlament ofgestëmmt gëtt. Do kann d'Parlament dee refuséieren a Konditioune setzen. Dann dräi Méint drop, wann de Kommissiounspresident mat sengem Collége sech virstelle kënnt. Och do kann d'Parlament refuséieren oder approuvéieren. Déi drëtte Kéier, wann d'Kommissioun eng komme léisst, wéi mir op Lëtzebuergesch soen. Da kann d'Parlament och e Mësstrauensvott ufroen. D'Parlament huet dat bis elo a ganz seelene Fäll gemaach, an deene Momenter seng Virrechter opzebesseren."

De Charel Goerens huet och schonn duerchblécke gelooss, dass d'Ursula von der Leyen op säi Support net onbedéngt ze waarde brauch. Mä fréistens an zwou Woche gëtt am Parlament iwwer den EU-Kommissiounspresident ofgestëmmt. E Mëttwoch awer schonn ass de Vott vum Parlamentspresident. Mä d'Besetzung vun deem Posten hänkt vum Gesamtpackage of, deen d'EU-Staats-a Regierungscheffe finalement proposéieren.

VIDEO: Stroossbuerg: Waarden op Resultater vu Bréissel
Bei der 1. Sëtzung vum neie Europaparlament dem Bréisseler Poker gespaant nogekuckt. Obwuel,och am Elsass war et zimlech animéiert.