Déi nächste Woch soll d’EU-Parlament jo iwwert den nächsten EU-Kommissiounspresident ofstëmmen.

An déi däitsch Verdeedegungsministesch steet do jo zum Vott.

Hir Wonschkandidatin wier d’Ursula von der Leyen net, seet déi gréng Europa-Deputéiert Tilly Metz.

Si wier ganz erstaunt gewiescht, wéi den Numm déi leschte Woch zirkuléiert war a wier och net begeeschtert gewiescht. Ma et misst een elo mol ofwaarden.

AUDIO: D'Tilly Metz

Donieft géif et sech hei ëm eng Kandidatin handelen, déi an hirem leschte Ministère net onëmstridde gewiescht wier. Dat géif kee gutt Bild vun Europa ofginn.

Wéi gesot misst een awer nach ofwaarden, esou d’Tilly Metz. Um Dënschdeg hätten déi Gréng ee Gruppmeeting, wou d’Diskussiounen tëscht der grénger Spëtzt an der Ursula von der Leyen ënnert d’Lupp geholl ginn. Eréischt duerno wäerten déi Gréng Positioun dozou huelen, wéi si d‘nächst Woch stëmme wäerten.

D'DP waart of, wat d'Ursula vun der Leyen der liberaler Fraktioun am Europaparlament ze soen huet a wat hir Pläng si fir déi grouss Erausfuerderunge wëllen unzegoen, esou den DP-Europadeputéierte Charel Goerens.

AUDIO: De Charel Goerens

Datt de Spëtzekandidate-Prinzip lo wéi et ausgesäit net agehale gëtt, gesäit de Charles Goerens manner dramatesch ewéi anerer.

Déi nominéiert Kandidatin Von der Leyen kënnt jo aus der Famill vun de Chrëschtdemokraten.  Ma d'Lëtzebuerger Vertrieder vun der CSV soen, et wier ze bedaueren, datt de Conseil a virop de franséische President Emmanuel Macron de Spëtzekandidate-System op Äis geluecht hätten, just well hinnen d'Personalien net an de Krom gepasst hätten.

Den Europadeputéierte Christophe Hansen betount awer, datt een d'Persoun Ursula von der Leyen net a Fro stellt.

AUDIO: De Christophe Hansen

De Christophe Hansen geet vun engem knappe Vott am Europaparlament aus, zu Gonschte vun der proposéierter Kandidatin. Fir d'Zukunft wier et wichteg, datt de Spëtzekandidate-System géif a Stee gemeesselt ginn.

D'Prozedur sou wéi se gelaf ass, kann een net begeeschteren an ass net sou verlaf, wéi mir dat erwaart hunn. Dat seet den LSAP-Europadeputéierten Nicolas Schmit nodeems d'Staats- a Regierungscheffen aus der EU d'Ursula von der Leyen als nei Kommissiounspresidentin nominéiert hunn. Wat d'Persoun selwer betrëfft betount de Nicolas Schmit, datt hien déi däitsch Ministesch kennt.

AUDIO: Den Nicolas Schmit

Et misst een da kucken wéi d'Prozedur vun der Nominatioun weidergeet, huet de Nicolas Schmit nach gesot.

Déi potentiell zukünfteg EU-Kommissiounscheffin Ursula von der Leyen stellt sech um Mëttwoch enger Rei Auditiounen am Europaparlament.

Si äussert sech eng éischte Kéier ëffentlech iwwert hir Pläng an Ziler, sollt si Presidentin vun der EU-Kommissioun ginn. D'nächst Woch sollen d'Europadeputéiert iwwert d'Nominatioun vun der däitscher Verdeedegungsministesch ofstëmmen.

D'CDU-Politikerin steet um Mëttwoch de Moie fir d'éischt der sozialdemokratescher Fraktioun Ried an Äntwert. Virun allem däitsch SPD-Politiker wëllen net fir si stëmmen.

Dono steet si virun der liberaler Fraktioun, éier et mëttes mat deene Grénge virugeet.

Um Programm stinn och Gespréicher mam neien EU-Parlamentspresident David Sassoli, souwéi deenen eenzele Fraktiounscheffen.

Viraussiichtlech soll d'Europaparlament de 16. Juli iwwert d'Nominatioun vun der Ursula von der Leyen ofstëmmen.