D'Europaparlament huet en Dënschdeg den Owend iwwert d'Nominatioun vun der Ursula von der Leyen als nei Presidentin vun der EU-Kommissioun ofgestëmmt.

Als éischt Fra an der Geschicht vun der Europäescher Unioun, gëtt d'Ursula von der Leyen Presidentin vun der EU Kommissioun zu Bréissel. Déi fréier däitsch Verdeedegungsministesch krut en Dënschdeg den Owend allerdéngs just eng knapp Zoustëmmung vum Europaparlament. D'CDU Politikerin krut 383 Stëmmen. Domat louch se 9 Stëmmen iwwert der néideger absoluter Majoritéit.

Si war och op Stëmme vun europaskepteschen Deputéierten ugewisen. 327 Europadeputéiert hu géint si gestëmmt. Si sot nom Votte, dass et hier gelonge wier eng pro-europäesch Majoritéit ze forméieren. Et wier eng grouss Éier fir si deemnächst un der Spëtzt vun der EU Kommissioun ze stoen, an den 1. November d'Successioun vum Jean-Claude Juncker ze iwwerhuelen. . Si wier iwwerwältegt vum Vertrauen den si vum Parlament krut, sot si an hirer éischter Ried direkt nom Votte als zukünfteg EU Kommissiounspresidentin op englesch:

AUDIO: Ursula von der Leyen

Wat dee knappen Ausgang ugeet, sot si, dass an der Demokratie d'Majoritéit d'Majoritéit ass.

"Endlech steet eng Fra un der Spëtzt vun der Kommissioun", sou den nach-President a fréiere Lëtzebuerger Premier Jean-Claude Juncker an enger éischter Reaktioun. Hie wier sécher, dass si eng exzellent Presidentin gëtt. Gratulatioune goufen et och vum franséische President Emmanuel Macron op Twitter. Et kéint een houfreg op Europa sinn. Et géif un hirer Säit stoen.

Si huet sech vill virgeholl. Eng vun hire wichtegsten Aufgaben ass elo eng Léisung ze fannen, fir de Gruef tëscht Ost a West an der EU. Si wéilt de Kommissären aus Osteuropa wichteg Ressorte ginn, sou d'Ursula von der Leyen. Och wëll si a permanentem Kontakt stoe mam Europaparlament.

AUDIO: Ursula Von der Leyen am Europaparlament

Reaktiounen

D'Tilly Metz huet direkt no der Annonce an engem Communiqué reagéiert. Beim Vott hunn déi Gréng mat Nee fir d'Kandidatin Ursula von der Leyen gestëmmt. D'Europadeputéiert Tilly Metz betount, datt een awer elo net dowéinst géif alles blockéieren oder boykottéieren. Et wëll ee mat der neier Kommissiounspresidentin zesummeschaffe fir virunzekommen.

Kramp-Karrenbauer gëtt nei Verdeedegungsministerin

Um Dënschdeg den Owend koum d'Nouvelle vun der Dpa, dass d'CDU-Cheffin Annegret Kramp-Karrenbauer iwwerraschenderweis nei Verdeedegungsministerin gëtt.