Den italieneschen Inneminister Matteo Salvini warnt Däitschland a Frankräich virdrun, d'Flüchtlingspolitik vun der europäescher Unioun eleng ze bestëmmen.

"Et geet duer mat Decisiounen, déi nëmmen zu Paräis an zu Berlin geholl ginn" schreift de Salvini op senger Facebook-Säit, wou och e Bréif fir de franséischen Inneminister dobäi ass.

Et kéint net sinn, datt déi franséisch an déi däitsch Regierung d'Migratiounspolitik an der europäescher Unioun bestëmmen an dobäi d'Fuerderungen ignoréiere vun deene Länner, déi am stäerkste betraff sinn, kritiséiert de Salvini an nennt Italien a Malta als Beispiller.

Italien wier op alle Fall net méi bereet, alleguer d'Migranten z'akzeptéieren, déi an Europa ukommen.
     
Zeilen, déi e Sonndeg publizéiert ginn, een Dag virun engem informelle Rendezvous vun den europäeschen Inneminister zu Paräis.

D'EU-Länner sichen um Méindeg zu Paräis weider no enger Léisung am Sträit ëm d'Rettung vu Migranten am Mëttelmier. Bei dëser informeller Aarbechtsreunioun ass och de Lëtzebuerger Aussen- an Immigratiounsminister Jean Asselborn dobäi. Eréischt d'lescht Woch haten Däitschland a Frankräich zu Helsinki probéiert eng europäesch Iwwergangsreegelung fir d'Verdeele vu Migranten, déi am Mëttelmier gerett goufen, ze erreechen. Dat ass hinnen awer net gelongen. Den däitschen Ausseminister Heiko Maas sot am Virfeld vun de Gespréicher zu Paräis, dass een net dierft labber loossen. Trotz all de Widderstänn misst eng gemeinsam Léisung fonnt ginn. Dat wier eng humanitär Verflichtung vun Europa, sou den SPD-Politiker.

Dëst Joer si schonn iwwer 400 Migranten ëm d'Liewe komm, déi probéiert hunn iwwert dat zentraalt Mëttelmier Direktioun Europa ze flüchten. Et kéint ee sou eng Katastroph virun eise Küsten net einfach sou acceptéieren, fuerdert den däitschen Ausseminister. Zil vun der Reunioun zu Paräis ass et, ongeféier 15 EU-Länner dozou ze beweegen bei enger Iwwergangsreegelung matzemaachen. Dat huet de franséischen Inneminister Christophe Casataner annoncéiert. Lëtzebuerg hat sech schonn d'lescht Woch prinzipiell dozou bereet erkläert bei sou engem Verdeeler-Mechanismus matzemaachen.

Déi geplangten Iwwergangsreegelung soll verhënneren, dass Italien a Malta Schëffer kënnen den Accès an hir Häfe verbidden. Béid Länner hunn dat an der Vergaangenheet e puer mol gemaach gehat, well si fäerten, mat der Verantwortung fir d'Migranten vun den EU-Partner eleng gelooss ze ginn. Als Konsequenz dovun souzen d'Migranten dacks deeglaang op de Booter fest, bis eng Léisung fonnt war.