Hien hat et am Virfeld annoncéiert. E Méindeg huet den neie britesche Premier Boris Johnson effektiv e Bréif un den EU-Rotspresident Donald Tusk geschéckt.

Dora freet hien, dass de Brexit mat der EU soll nei verhandelt ginn.

En neit Austrëtt-Ofkommes hätt fir seng Regierung iewescht Prioritéit.

Den Hoke bei der Saach ass, dass den Johnson nees Ännerungen am existenten Austrëttsaccord wëll hunn. Eppes, wat d'EU-Responsabel bis ewell kategoresch refuséiert hunn.

Et geet an éischter Linn ëm d'Grenz tëscht dem EU-Member Irland an der britescher Provënz Nordirland. London fäert, iwwert déi Grenz an der europäescher Zollunioun mussen ze bleiwen.

Op oppen Oueren zu Bréissel brauch de Boris Johnson awer net all ze vill ze hoffen.

D'EU besteet drop, dass nom Brexit keng Wuerekontrollen op der Grenz tëscht Nordirland an Irland agefouert ginn. Dat Ganzt nennt sech Backstop. Déi Klausel gesäit vir, dass Groussbritannien esou laang an der Zollunioun bleift, bis dass een eng aner Léisung fonnt huet, déi esou Kontrollen iwwerflësseg mécht. Den neie britesche Premier besteet awer drop, dass d'EU a London de Backstop sträichen.

Esouguer déi britesch Press spekuléiert, dass den Johnson et mat sengem Bréif net eescht gemengt huet, mä nëmme wollt de Schäi vermëttelen, dass hien, wéi versprach, Neiverhandlunge wéilt an d'Wee leeden.

Nei am ganzen Dossier ass dann eng Analys, déi zu London nawell Angscht mécht. Et ass ee Regierungspabeier iwwert d'Suitte vun engem haarde Brexit Enn Oktober

Et kéint dramatesch fir d'Britte ginn.

Liewensmëttel a Medikamenter riskéieren, knapp ze ginn. Den Trafic riskéiert pure Chaos ze ginn, well bis zu 85% vun de britesche Camionen net prett sinn, fir op der Grenz mat Frankräich, also um direkte Wee an Europa ze passéieren.

An de groussen Häfen un der Manche wäerte kilometerlaang Stauen entstoen.

Wéi gesot, géifen d'Medikamenter knapp ginn, esou déi britesch Experten, well London ronn 75% dovunner importéiere muss.

Parallel géif et och enk bei den Iesswuere ginn. Dowéinst géifen d'Präisser klammen. Schwaach Menagë géifen extrem dorënner leiden.

Parallel géif de Präis vu Bensin, Diesel a Masutt an d'Luucht goen. Elleng an de britesche Raffinerië misste bis zu 2.000 Leit entlooss ginn. Virun deem Hannergrond géif d'britesch Insel schwéier Protester riskéieren.

Dat do, esou steet et déck ënnerstrach am Regierungspabeier, wier ee wahrscheinlechen Zeenario an nach laang net de "Worst case".

An der Ekipp Johnson reagéiert ee gereizt. Et wieren al Kamellen, déi do nees opdauchen aus der Zäit vun der viregter Premierministesch Theresa May mam Zil, dem Boris Johnson seng Initiativ ze torpedéieren.

Komesch just, dass d'Dokument op dëse Mount datéiert ass, esou d'britesch Press ...