Wat den Hulk méi rose gëtt, wat den Hulk méi staark gëtt, dat sot de britesche Premier an engem Interview mam "Mail on Sunday".

Am Zesummenhang mam Brexit steet e Méindeg de Grand-Duché am Mëttelpunkt vun der internationaler Aktualitéit. De britesche Premier Boris Johnson ass op Besuch hei am Land. No engem Aarbechtsiesse mam Kommissiounspresident Jean-Claude Juncker a mam Chefnegociateur Michel Barnier gesäit hien och ganz kuerz de Premier Xavier Bettel.

Een Dag viru senger Visitt hei am Land huet de Boris Johnson eng originell Aart a Weis fonnt, fir seng Positioun z’erklären: hien huet sech a säi Land mam imaginäre Superheld "den incredible Hulk" verglach. An engem Interview mam "Mail on Sunday", seet de Boris Johnson e Sonndeg nach emol seng Determinatioun a betount, datt Groussbritannien den 31. Oktober d’EU verléisst. "Wat den Hulk méi rose gëtt, wat den Hulk méi staark gëtt. Egal wéi fest hie gefesselt ass, kritt hie sech befreit. Dat ass och de Fall vun dësem Land, mir kommen den 31. Oktober eraus", sou de Boris Johnson.

De britesche Premier huet am Interview och behaapt et kéim een an de Verhandlunge mat der EU, fir een neien Accord ze verhandelen, "enorm" gutt virun. Hien hätt ganz gutt Gespréicher mat de Leadere vun der EU iwwert déi kriddeleg Fro vun der nordirescher-irescher Grenz. De Boris Johnson verwerft d’Demande vun der EU, datt Groussbritannien provisoresch Member vum europäesche Marché bleift bis een neien Handelsaccord steet.

Et géing zwar nach vill Aarbecht virum EU-Sommet vum 17. Oktober ustoen, mä hie géing um leschte Sommet virum programméierte Brexit en Accord mat heem huelen, sou de Boris Johnson. EU-Vertrieder waren dës Woch effektiv och net ganz optimistesch, datt een Accord kéint fonnt ginn.