Fir iwwert dëst Thema ze schwätzen, war de fréiere Finanzminister an aktuelle President vun der Chambre de Commerce Luc Frieden um Plateau op der Tëlee.

„D'Englänner waren ni richteg an der europäescher Politik. De Brexit wier eng Konsequenz vu 40 Joer Zickzack an der europäescher Politik vu Groussbritannien, esou de President vun der Chambre de Commerce Luc Frieden, e Mëttwoch den Owend am RTL Interview.

D'Brexit-Prozedure déi zanter 3 Joer leeft, wier e Beispill dofir, datt een net eleng kann eng ganz Rei Problemer léisen. Et géif een elo gesinn, datt ee Liene mat Länner iwwert der Grenz ewech bréicht. Ewéi genau déi Liene sollen ausgesinn, weess een awer nach net. Dohier d'Verzögerung.

D'Schold vum Brexit-Streit läit virun allem bei de Briten, esou de Luc Frieden. Dacks wier d'Beispill vun der Schwäiz oder Norwegen an England promouvéiert ginn. Dës Länner géifen och ausserhalb vun der Europäescher Unioun funktionéieren. Ma wann ee wéilt Handel mat der EU maachen, da muss ee kloer festleeën, wéi déi Relatioun soll ausgesinn, esou de Luc Frieden. D'Schwäizer hätten eng ganz intensive Relatioun mat der Unioun, do inclus wier d' Fräi-Zirkulatioun vun de Leit. Norwegen huet dat am Kader vum Europäesche Wirtschaftsraum. D'Englänner par contre hunn sech ni wierklech ausgedréckt wéi déi Relatioun soll ausgesinn. Mä do ass a bléift d'Land wahrscheinlech och dividéiert. Och an de Jore virum faméise Referendum wier nëmme seele vu britesche Politiker erkläert ginn, wat d'Avantagë vun der Unioun sinn.

Déi eventuell Extensioun vum Brexit iwwert den 31. Oktober eraus, déi elo och am englesche Gesetz virgesinn ass, géif just en Iwwergangsaccord ënnerstëtzen. Mä déi fundamental Fro iwwert d'Relatioun tëscht Groussbritannien an der Unioun bléift och no engem Deal, en Deal dee just d'Relatioun fir déi nächst 12 bis 24 Méint géif garantéieren, oppen, esou de Luc Frieden.

Ekonomesch gesinn huet Lëtzebuerg bis ewell vun der Annonce vum Brexit profitéiert. Net nëmmen englesch Firmen, ma och international Firmen, déi virdrun iwwer London de Bannemaart ugesteiert hunn duerch den EU Pass, hunn hire Wee an de Grand-Duché fonnt. Insgesamt 60 Stéck. 45 dovu ginn och vun der CSSF kontrolléiert. De gréissten Effekt hätten awer bestoend Firmen, déi hir Aarbecht zu Lëtzebuerg ausgebaut hunn.

Verschidden Etüden hunn an de leschte Méint Lëtzebuerg als ee vun de grousse Verléierer vum Brexit annoncéiert. De Luc Frieden gesäit dat net esou. Am Haaptsecteur zu Lëtzebuerg, dem Finanzsecteur, wiere vill eesäiteg Mesurë geholl ginn, fir en haarde Brexit ofzefiederen. Dem Frieden seng grouss Suerg wier net déi ekonomesch Konsequenz vun engem haarde Brexit fir Lëtzebuerg, ma dat wat 12 bis 24 Méint méi spéit kënnt. Déi Accorden duerno kéinten sech iwwer Joren zéien an och ekonomesch Auswierkungen op Lëtzebuerg hunn. Groussbritannien ass no Däitschland, den zweetgréissten Handelspartner vu Lëtzebuerg. 2017 waren et Geschäfter an der héicht vu 27 Milliarden Euro. Ma Lëtzebuerg hätt am Passé gewisen, datt ee ganz gutt ka mat 3.-Länner, wéi New York oder Asien, schaffen.

Déi grouss Changementer kommen am Cargosecteur fir d'Entreprisen, ma och Privatpersounen. Den Avantage vum Bannemaart ass, datt d'Wuere fräi zirkuléieren, ouni Douanestaxen. Wueren, ewéi Kleeder, déi an Zukunft aus Groussbritannie kommen, kaschten an Zukunft 11% méi. Ähnlech ewéi wann ee Gidder aus Amerika oder Asien bestellt.

Fir d'Entreprise och ausserhalb vum Finanzsecteur z'ënnerstëtzen, hat Chambre de Commerce am Virfeld schonn eng Helpline ageriicht a Konferenzen organiséiert. Betriber déi direkt impaktéiert sinn, wiere gutt preparéiert, esou de Luc Frieden.

Weiderhi wiere Wirtschaftsmissioune ganz wichteg, an Zukunft vläicht och an England. Et dierft een den englesche Marché, och no engem Brexit, net ënnerschätzen. Dofir hätt de Luc Frieden och an der Chambre de Commerce proposéiert, an Zukunft en Vertrieder vun der Chamber op der Lëtzebuerger Ambassade zu London sëtzen ze hunn. Fir e Marché z'exploréieren, deen net nëmme wichteg ass fir d'Finanzdéngschtleeschtungen. Ma dofir brauch et och e bilateralen Accord tëscht Lëtzebuerg a Groussbritannien an der Zukunft. Lëtzebuerg misst besser a méi schnell sinn ewéi déi aner, fir weider Attraktiv ze sinn.

Mat Groussbritannien géif een en Alliéierten, deen och Konkurrent ass, verléieren. Et misst een en awer um wirtschaftleche Plang behalen, esou de Luc Frieden. Et géif een an der Chambre de Commerce alles maachen, fir grad tëscht de Finanzzentren déi Kooperatioun kënnen ze maachen.