Den Nicolas Schmit, designéierten EU-Kommissär fir „Jobs“, gouf um Dënschdeg de Moien am EU-Parlament gehéiert.

„Ech hunn net gelidden, mä et war haart“, sou den Nicolas Schmit a senger Konklusioun virun der Aarbechtskommissioun am EU-Parlament.

3 Stonne laang huet de fréiere Minister - haaptsächlech op Englesch, mä och op Franséisch an Däitsch - fir méi sozial Rechter fir d’Aarbechter plädéiert, allerdéngs ëmmer am Respekt vun der Souveränitéit vun den eenzele Memberstaaten an ouni konkret Virschléi ze presentéieren.

Sou wéilt oder kéint een en europawäite Mindestloun net imposéiere, sou den Nicolas Schmit. A ville Memberstaaten sinn d’Léin duerch Kollektivverträg festgesat. Et géing een awer – am Dialog mat de Sozialpartner – Instrumenter siche fir sécherzestellen, datt d’Aarbechter an der ganzer Unioun dezent liewe kënnen. Wier en dezent Liewen net garantéiert, da géing ee riskéieren, datt d’Leit politesch „verréckt“ ginn.

Hearing vum Nicolas Schmit
Den Nicolas Schmit, designéierten EU-Kommissär fir „Jobs“, gouf um Dënschdeg de Moien am EU-Parlament gehéiert.

Zum Thema „Sozialdumping duerch d’Plattformeconomie“, d’sougenannt „Uberisatioun“, do sot den Nicolas Schmit, et misst een déi Leit respektéieren, déi gär onofhängeg sinn. Op der anerer Säit misst ee garantéieren, datt se och Rechter hunn, beispillsweis am Fall vun Accidenter.

Den 23. Oktober stëmmt d’EU-Parlament iwwert déi ganz Ekipp vum Ursula von der Leyen, déi den 1. November d’Juncker-Kommissioun soll ofléisen.

Déi designéiert Kommissiounscheffin muss allerdéngs hir Ekipp ëmbauen.
E Méindeg goufen d'Kandidaten aus Ungarn a Rumänien op en neits verworf. Hinne ginn Interessekonflikter virgeheit. Déi juristesch Kommissioun vum Europaparlament huet offiziell ee Veto géint déi betraffe Kandidaten ageluecht. Ungarn huet doropshin direkt een neie Kandidat proposéiert. Den ungareschen EU-Ambassadeur vu bis elo gouf an d'Course geschéckt. Rumänien huet iwwerdeems d'Kandidatur zeréckgezunn awer nach keen neien Numm proposéiert.

Fir d'Ursula von der Leyen ass dëst ee Réckschlag. Hir gëtt reprochéiert, d'Propos vun den EU-Staaten net anstänneg gepréift ze hunn. Elo kéint den Timing also duerchernee geroden.